په بغلان، فاریاب او پکتیکا ولایتونو کې د بانکي سکتور د لا ټینګښت په اړه غونډه
د بانکي سکتور د ټيکاو، ټینګښت او لا پیاوړتیا په موخه د افغانستان بانک د هڅو په لړ کې دا ځل په بغلان، فاریاب او پکتیکا ولایتونو کې جلا جلا غونډې جوړې شوې.
په یادو غونډو کې د دې ولایتونو له چارواکو، سوداګرو، د سوداګریزو بانکونو له استازو، اصنافو، سمیهایزو او قومي مشرانو سره د هېواد په اقتصادي رغښت کې د بانکي سکتور په ارزښت، ټیکاو، ټینګښت او پیاوړتیا بحث او د نظرونو تبادله تر سره شوه. همدارنګه په یاده غونډه کې له دې سکتور سره د خلکو د همکارۍ په اړه هم د نظرونو تبادله تر سره شوه او د غونډې ګډونوالو له یاد سکتور څخه خپل ملاتړ اعلان کړ.
د یادونې وړ ده چې د افغانستان بانک تل هڅه کړې ده چې د بانکي سکتور د پیاوړتیا لپاره کار وکړي او د درنو هېوادوالو لپاره په دې برخه کې اړینې آسانتیاوې برابرې کړي. د بانکي سکتور د لا پیاوړتیا لپاره د افغانستان بانک د هلو ځلو دا لړۍ دوام لري او د هېواد تر ټولو ولایتونو به ورسېږي.
