په مرکزي زون کې د افغانۍ زاړه بانکنوټونه وسوځول شول
۱۴۰۰ د سلواغې ۱۰ مه– د افغانستان بانک د قانون د ۳۹ او ۴۲ مادې پر بنسټ یو سل او پنځوس میلیونه زاړه او له کاره لویدلي بانکنوټونه د ټاکل شوي پلاوي په شتون کې تر دقیقې شمېرنې وروسته و سوځول شول.
د افغانستان بانک سرپرست ښاغلي عبدالقاهر ( حاجي ادریس) له دې پروسې څخه د لیدنې پر مهال یادونه وکړه چې د افغانستان بانک تل هڅه کوي چې د درنو هېوادوالو لپاره اړینې بانکي آسانتیاوې رامنځته کړي. نوموړي زیاته کړه چې د زړو بانکنوټونو راټولول او په نویو د هغو بدلول هم د خلکو لپاره آسانتیاوو د رامنځته کولو په خاطر په نظر کې نیول شوي دي.
د هغه په خبره دا چې بانکنوټونه له وخت وړاندې زاړه او له کاره لوېږي، دا د دې څرګندونه کوي چې هېوادوال د سوداګریزو راکړو او ورکړو پر مهال د بانکنوټونو ساتنې ته پاملرنه نه کوي.
د افغانستان بانک سرپرست له ټولو هېوادوالو وغوښتل چې د سوداګریزو راکړو او ورکړو پر مهال د بانکنوټونو ساتنې ته پوره پاملرنه وکړي، څو په دې وسیله د بانکنوټونو له ژر زړیدو څخه مخنیوی وشي.
د یادونې وړ ده، چې په راټولو شویو بانکنوټونو کې د افغانۍ لسګون او شلګون نوعې شاملې وې، چې د عدلیې او مالیې وزارتونو، اړوندو ادارو او د افغانستان بانک د بېلابېلو څانګو استازو په شتون کې تر دقیقې شمېرنې وروسته بارګیري او د سوځولو ځانګړو کرو کې له منځه یوړل شول.
