د افغانستان بانک د اسلامي بانکوالۍ او د افغانۍ د دودولو په اړه د هېواد د دیني عالمانو نظرونه ترلاسه کوي
کابل، ۱۳۹۸ د کب ۸ – د افغانستان بانک رهبري پلاوي د هېواد له دیني عالمانو سره د ناستو په لړ کې دا ځل د افغانۍ د لا دودیدو او د اسلامي بانکوالۍ او مالي خدمتونو د موضوعاتو په اړه له دریو تنو دیني عالمانو، دوکتور محمد ایاز نیازي، مولوي عبدالتواب حنیف او مولوي رضا خان سیرت سره بحث او خبرې اترې وکړې.
د دې ناستې په اوږدو کې د افغانستان بانک سرپرست او لومړي مرستیال ښاغلي واحد الله نوشیر د افغانۍ په دودیدولو کې د هېواد د دینې عالمانو د ارزښتناک رول او د اسلامي بانکوالۍ او مالي خدمتونو په برخه کې د دوی د نظرونو د ارزښت په اړه خبرې وکړې او زیاته یې کړه چې د افغانستان بانک د افغانۍ لا دودیدو او د اسلامي بانکوالۍ ودې ته پاملرنه کوي او د بانک په اداري جوړښت کې یې د اسلامي بانکوالۍ د آمریت د رامنځته کولو سربیره په هېواد کې یو بشپړ اسلامي بانک ته د فعالیت جواز ورکړی دی.
ښاغلي نوشیر د اسلامي بانکوالۍ د ښه والي لپاره د علماوو له نظرونو څخه د ګټې اخیستنې د ژمنې ترڅنګ وویل چې د اسلامي بانکوالۍ په اړه به له پوهانو او دینې عالمانو سره سلا مشورې دوام ولري او هیله مند یم چې د هېواد دیني عالمان د افغانۍ د دودولو او د اسلامي بانکوالۍ د هدف د پیغام رسولو په برخه کې د افغانستان بانک سره همکاري وکړي او ارزښت یې د مسجدونو او منبرونو له لارې خلکو ته بیان کړي.
د دې ناستې ګډونوالو د اسلامي بانکوالۍ په اړه د خپلو نظرونو د شریکولو ترڅنګ د افغانۍ د دودولو په اړه د جامع پروګرامونو او د اسلامي بانکوالۍ د لا پیاوړتیا په برخه کې د افغانستان بانک له دوامدارو هڅو مننه وکړه او ژمنه یې وکړه چې د ملي هویت په توګه به د افغانۍ په دودیدو او د اسلامي بانکوالۍ په وده کې له افغانستان بانک سره همکاري کوي.
