د افغانستان بانک سرپرست رئیس د سوداګریزو بانکونو له استازو سره ولیدل
۱۴۴۴ د رمضان المبارک ۷ مه – د افغانستان بانک سرپرست رئیس ښاغلي الحاج هدایت الله بدري د سوداګریزو بانکونو او د افغانستان د بانکونو ټولنې له استازو سره ولیدل.
په یاده غونډه کې د افغانستان بانک سرپرست رئیس ښاغلي الحاج هدایت بدري د بانکي سکتور پر لا پیاوړتیا ټینګار وکړ او یادونه یې وکړه چې هڅه مو دا ده څو دا سکتور په ښه ډول مدیریت شي او له دې لارې د هېواد د اقتصادي رغښت او پرمختګ لپاره لاره هواره شي.
نوموړي د سواګریزو بانکونو استازو ته ډاډ ورکړ چې د افغانستان بانک د قوانینو او مقرراتو په رڼا کې د هر ډول همکارۍ لپاره ژمن دی او پدې برخه کې به له هېڅ ډول همکارۍ درېغ و نه کړي.
د دې غونډې په اوږدو کې د سوداګریزو بانکونو استازو هم خلکو ته د غوره خدمتونو د وړاندې کولو ژمنه وکړه. د یادونې وړ ده چې په دې غونډه کې د افغانستان بانک لومړي مرستیال ښاغلي نوراحمد آغا او د دې بانک د ریاست د دفتر لوی آمر ښاغلي صدیق الله خالد هم ګډون درلود.
