د افغانستان بانک لومړي مرستیال په فراه ولایت کې د افغانستان بانک نمایندګۍ څخه لېدنه وکړه
۱۴۴۵ کال د ربیع الثاني ۱۷ – د افغانستان بانک لومړي مرستیال، ښاغلي نوراحمد آغا چې د یو پلاوي په مشرۍ لوېدیځ زون ته په سفر تللی دی، د خپل سفر په لړ کې یې نن د افغانستان بانک د فراه ولایت نمایندګۍ له کارکوونکو سره لېده کاته وکړل او هغوی ته یې لازمې سپارښتنې وکړې.
د افغانستان بانک لومړي مرستیال، ښاغلي نوراحمد آغا له ټولو کارکوونکو وغوښتل څو خلکو او سوداګرو ته معیاري بانکي آسانتیاوې او خدمتونه وړاندې کړي او د هېواد د وضعیت په ښه والي کې خپله ونډه ترسره کړي. هغه د خپلو خبرو په لړ کې په خلکو غږ وکړ ترڅو په خپلو ټولو راکړو ورکړو کې د افغانۍ کارولو ترڅنګ د هغې سمې ساتنې ته هم پاملرنه وکړي تر څو د ژر زړېدا مخه یې ونیول شي.
