د افغانستان د صنایعو او کانونو خونو له پلاوي سره د افغانستان بانک د سرپرست لیدنه
۱۴۰۰ کال د وري ۲۹ مه – د افغانستان بانک سرپرست ښاغلي اجمل احمدي د افغانستان د صنایعو او کانونو خونو له پلاوي سره ولیدل او د بانکونو له لوري صنعتکارانو او د منځنیو او کوچنیو تشبثاتو لپاره د پورونو د ورکړې د آسانیتا پروګرام په اړه یې ور سره خبرې وکړې.
د غونډې په پیل کې د افغانستان بانک سرپرست ښاغلي اجمل احمدي د سوداګریزو بانکونو له لوري د پورونو د ورکړې په برخه کې د آسانتیاوو په رامنځته کولو، په خوندي، ډاډمن او بېړني ډول د مالیاتو د ورکړې لپاره د اداینو د سیستم پر برېښنایي کولو او د هېواد د اقتصاد د رسمي کولو او له فساد څخه د مخنیوي په برخه کې د یاد سیستم پر رول خبرې وکړې. نوموړي ژمنه وکړه چې په دې برخه کې به له هېڅ ډول هلو ځلو درېغ و نه کړي.
ورپسې د افغانستان د صنایعو او کانونو د خونو رئیس ښاغلي رحیم الله سمندر د هېواد د اقتصادي پرمختګ په برخه کې د صنعت په رول د خبرو تر څنګ د سوداګرۍ او صنعت وزارت د چوکۍ پر مهال د ښاغلي اجمل احمدي د هڅو ستاینه وکړه. نوموړي زیاته کړه هغه مهال د ښاغلي احمدي په هڅو له افغان ملي بانک سره یو هوکړه لیک لاسلیک شو چې پر بنسټ یې صنعتکارانو ته په لږې ټکټانې سره پورونه برابر شول.
د افغانستان د صنایعو او کانونو د خونو پلاوي د هېواد په اقتصادي برخه په ځانکړې توګه د بانکوالۍ سکتور د پرمختګ او پراختیا په برخه کې د افغانستان بانک له سرپرست ښاغلي اجمل احمدي مننه او قدرداني وکړه او نوموړي ته یې د تقدیر دړه ورکړ.
