د پیسو وینځلو او نورو جرمونو سره د مبارزې د همغږۍ عالي کمیسیون د اوومې غونډې جوړېدل
۱۴۴۵ جمادي الاول ۷ مه – د افغانستان بانک د لومړي مرستیال او سرپرست ښاغلي نوراحمد آغا په مشرۍ د همغږۍ عالي کمیسیون، اوومه غونډه جوړه شوه. په یاده غونډه کې د افغانستان بانک لومړي مرستیال او سرپرست ښاغلي نوراحمد آغا یادونه وکړه چې د افغانستان اسلامي امارت تر بیا ځلي فتحې وروسته دا دویمه غونډه ده چې د همغږۍ عالي کمیسیون د غړو او استازو په ګډون جوړېږي.
د نوموړي په خبره د دې کمیسیون اصلي موخه د ا.ا.ا اداراتو ترمنځ د لازمه همغږۍ رامنځته کول دي. ښاغلي نور احمد آغا زیاته کړه د اړوندو ادارو تر منځ همغږي او همکاري به د دې لامل شي چې د پیسو وینځلو، نورو اقتصادی جرمونو او نشه یي توکو څخه لاس ته راغلی عوایدو سره مؤثره مبارزه وشي.
ښاغلی نوراحمد آغا وویل د دې غونډې بل هدف دا دی، څو نړیوالو ته وښیي چې د افغانستان اسلامي امارت له ټولو نړیوالو هېوادونو، مالي او بانکي بنسټونو سره د غوره اړیکو ساتنې ته ژمن دی او د دې تر څنګ له شرعي پلوه د غیر مشروع کړنو له لارې د لاسته راغلو عوایدو سره مبارزه خپله دیني او اسلامي وجیبه ګڼي.
نوموړي زیاته کړه د افغانستان اسلامي امارت له دریځ سره سم مونږ له ټولې نړۍ سره د ښو اړیکو غوښتونکي یو او د افغانستان بانک ژمن دی چې په خپله برخه کې ټول هغه قوانین اومقررات چې له اسلام سره په ټکرکې نه وي عملي کړي، څو نړیوال هم په دې برخه کې د قانون له پلي کېدو څخه ډاډمن شي.
تر هغې وروسته د افغانستان بانک د مالي رپوټونو او معاملو دشننې مرکز لوی آمر ښاغلي جمال ناصر رئوفي چې د یاد کمیسیون د دارالانشاء رئیس هم دی د افغانستان د پیسو وینځلو او نورو جرمونو سره د مبارزی رژیم، قوتونه، نیمګړتیاوی، فرصتونه، ننګونې او په ملی کچه د اداراتو ترمنځ د همغږی او همکاری د لا پیاوړتیا په رابطه مفصل معلومات ورکړل. ورپسې د یاد مرکز د د دارالانشاء نورو غړو هم د غونډې له ګډونوالو سره دځانګړو غیرمالی تشبثونو او حرفو سکتور نظارت او د چارو د تنظیم، د تنفیذی ادارو د پیسو وینځلو سره د مبارزی ظرفیت لوړاوی، دوه اړخیزه مالوماتو د تبادلي په برخه کی لازم معلومات شریک کړل او د شپږمې غونډې د پریکړو په اړه یې تفصیلي خبرې وکړې.
د یادونې وړ ده چې په دې غونډه کې د افغانستان بانک د ریاست د دفتر لوی آمر ښاغلي صدیق الله خالد هم په خپل وار سره د غونډې دګډونوالو بېلابېلو پوښتنو او اندیښنو ته یې د افغانستان بانک دکړنو او فعالیتونو په اړه هر اړخیز معلومات ورکړل.
په دغه غونډه کې د بهرنیو چارو، کورنیو چارو، مالیې او عدلیې د محترمو وزارتونو، استخباراتو لوی ریاست، سترې محکمې، د فرامینو او احکامو د تطبیق او څارنې د لوی ریاست استازوګډون درلود او د همغږی عالی کمیسیون د شپږمې غونډي د ورسپارل شوو دندو د تطبیق څرنګوالی په اړه مفصل معلومات د غونډې له ګډونوالو سره شریک کړل او د افغانستان ملی اقتصاد وضعیت او د پیسووینځلو او نورو جرمونو سره د مبارزي اهمیت ته په کتو سره ټولو ادارو له خپله اړخه د پوره همکارۍ ډاډ ورکړ.
