د مالیې وزارت د بیمې د چارو کارکوونکو لپاره د افغانستان بانک د روزنیز پروګرام دویم پړاو پای ته ورسېد
کابل، ۱۳۹۷ د سلواغې ۱۰ – د مالیې وزارت د بیمې چارو د ریاست کارکوونکو لپاره د روزنیز پروګرام دویم پړاو چې د افغانستان بانک لخوا د مالي چارو د څارنې، د مالي سکتور د مستهلکینو د حقونو د تأمینولو، مالي خطرونو او د مالي شخړو د هوارولو په برخو کې جوړ شوی ؤ، پای ته ورسېد.
د روزنیز پروګرام په پای کې د افغانستان بانک دویم مرستیال ښاغلي محمد قسیم رحیمي د روزنیزو پروګرامونو د ارزښت په اړه د ټینګار په ترڅ کې وویل چې د افغانستان بانک او د مالیې وزارت ترمنځ په بیلابیلو برخو کې همکاري شتون لري چې یو یې د څارنې، د مالي سکتور د مستهلکینو د حقونو د تأمینولو، مالي خطراتو او د مالي شخړو د هوارولو په برخو کې د مالیې وزارت د بیمې چارو د ریاست د کارکوونکو روزل دي.
ښاغلي رحیمي د دې پروګرام له ګډون کوونکو څخه وغوښتل هغه څه چې یې د دې روزنیز پروګرام له لارې زده کړي دي، د هېواد د بیمې سکتور د لا ښه والي لپاره وکاروي.
د هغه هوکړه لیک پر بنسټ چې مخکې د افغانستان بانک د مالي خدمتونو د پراختیا د لوی آمریت او د مالیې وزارت د بیمو چارو د لوی ریاست ترمنځ شوی ؤ، د کال له پیل څخه تر اوسه پورې د افغانستان بانک د بیلابیلو شعبو د کارکوونکو لخوا په دوو پړاوونو کې روزنیز پروګرامونه په لاره اچول شوي دي.
د یادولو وړ ده چې د دې پروګرام په پای کې د مالیې وزارت د بیمو چارو د لوی ریاست ۲۴ تنو کارکوونکو ته تصدیق لیکونه وویشل شول.
