د اقتصادي وضعیت، بانکي چارو د همغږۍ او همکارۍ په اړه غونډه
د ۱۴۴۴ کال د ربیع الاول ۲۷ مه – د افغانستان بانک د سرپرست رئیس ښاغلي عبدالقاهر حاجي ادریس پر مشرۍ په افغانستان کې د هند هېواد د تخنیکي ماموریت له مشر ښاغلي بهارت کُمار سره د اقتصادي وضعیت، بانکي چارو د همغږۍ او همکارۍ غونډه جوړه شوه.
په یاده غونډه کې د هېواد د اقتصادي وضعیت په اړه هر اړخیزې خبرې وشوې او دواړو لورو د بانکي سکتور په برخه کې د همکارۍ ژمنې وکړې.
د افغانستان بانک سرپرست رئیس ښاغلي عبدالقاهر حاجي ادریس یادونه وکړه چې د افغانستان بانک ژمن دی چې د قوانینو او مقرراتو په رڼا کې له ټولو هېوادونو سره غوره اړیکې ولري او په بانکي برخه کې په ملي او نړیواله کچه اسانتیاوې رامنځته کړي.
باید وویل شي چې په دې غونډه کې د افغانستان بانک د ریاست د دفتر لوی آمر ښاغلي صدیق الله خالد د دواړو هېوادونو تر منځ په بانکي برخو کې پر همکاریو ټینګار وکړ او یادونه یې وکړه چې په تخنیکي برخو کې همکارۍ کولای شي د بانکي سکتور په برخه کې ګټورې ثابتې شي.
