د افغانستان بانک د اتیایمې کلیزې په مناسبت هڅوونکې لیدنه
کابل، د ۱۳۹۸ کال د سلواغې ۸ مه – د افغانستان بانک سرپرست او لومړي مرستیال ښاغلي واحدالله نوشېر د افغانستان بانک له یو شمېر معیوبو او معلولو کارکوونکو سره د دې بانک د اتیایمې کلیزې د پوره کېدو په مناسبت تشویقي او هڅوونکې لیدنه وکړه.
په دې لیدنه کې د افغانستان بانک سرپرست او لومړي مرستیال د دې بانک له معیوبو او معلولو کارکوونکو سره د هر ډول همکارۍ ژمنه وکړه او د افغانستان بانک په اډانه کې یې د دوی چارې وستایلې.
ورپسې د افغانستان بانک یو شمېر معیوبو او معلولو کارکوونکو د افغانستان بانک د سرپرست او لومړي مرستیال له دغو نیکو احساساتو او انساني عاطفې مننه وکړه او خپلې ستونزې ورسره شریکې کړې.
ښاغلي نوشېر له یادو کارکوونکو وغوښتل چې خپلې ستونزې دې په لیکلې بڼه ورسره شریکې کړي، چې له مخې یې په ښه ډول د دوی ستونزو ته رسېدنه وکړي.
پاتې د نه وي چې د افغانستان بانک مشرتابه هڅه کوي چې د قوانینو او مقررو له لارې د خپلو کارکوونکو د ستونز و حل ته مناسبې لارې پیدا او پر مټ یې هغو ته د پای ټکی کېږدي.
