د بانکي سیسټم له لارې د بشري مرستو د لیږلو په اړه د امریکا د متحده ایالاتو د خزانې وزارت له پرېکړې هر کلی
۱۴۰۰ د سلواغې ۱۴ مه - د امریکا د خزانې وزارت په دې وروستیو کې نړیوالو بانکونو ته د افغانستان د خلکو لپاره د بشري مرستو د لېږلو اجازه ورکړه، چې له مخې یې نړیوال بانکونه کولای شي په افغانستان کې له خصوصي او دولتي بانکونو سره د افغانستان خلکو ته د بشري مرستو د لېږد په برخه کې د آسانتیاوو د رامنځته کولو لپاره غوره اړیکې رامنځته کړي.
په ورته وخت کې د صادر شوي لارښود پر بنسټ، نړیوالې مرستندویه موسسې کولای شي چې له کومې اندیښنې پرته د افغانستان د پوهنې، روغتیا او نورو ټولګټو برخو کې مرستې وکړي.
د افغانستان بانک د امریکاد متحده ایالتونو د دغه اقدام ستاینه کوي او په ورته وخت کې د خصوصي سکتور لپاره د بانکي اړیکو د تنظیم او اسانتیا په برخه کې د لا زیاتو همکاریو غوښتنه کوي.
