د جهان پوهنتون د اقتصاد پوهنځي محصلینو ته روزنیز او د پوهاوۍ ورکشاپ جوړ شو
کابل، ۱۳۹۸ د لړم ۱۵، د افغانستان بانک محصلینو ته د پوهاوۍ او روزنیزو پروګرامونو په لړ کې، دا ځل د جهان پوهنتون د اقتصاد، مالي او بانکي څانګو محصلینو ته د بانک د دندو، موخو او سیاستونو په اړه روزنیز ورکشاپ جوړ کړ.
په پیل کې د افغانستان بانک د ریاست د دفتر لوی آمریت مرستیال ښاغلي شفیق الله بارز له اکاډمیکي ټولنې سره د افغانستان بانک د همکاریو په اړه خبرې وکړې او زیاته یې کړه چې د معلوماتو د شریکولو، حساب ورکولو او روڼتیا په اړه د داسې ورکشاپونو په لاره اچول، د بانک د ستراتیژیکو پروګرامونو برخه ګڼل کیږي. همدا ډول هغه یادونه وکړه چې تعلیمي او تحصلي مرکزونه د خلکو د مالي سواد د کچې د لوړولو په برخه کې د بانک د ارزښت لرونکو شریکانو له ډلې څخه ګڼل کیږي.
ښاغلي بارز محصلیونو ته د دا ډول ورکشاپونو په لاره اچول ډېر ارزښتناکه وبالل، ځکه هغه څه چې محصلین د ورځنیو درسونو په اوږدو کې د تیورۍ په بڼه زده کوي، د دې ورکشاپونو له لارې د هغه د تطبیق له عملي طریقو او جوړولو سره اشنا کیږي.
ورپسې د جهان پوهنتون د اقتصاد پوهنځي رئیس ښاغلي حنیف الله بشار د افغانستان بانک پلاوي ته د ښه راغلاست ترڅنګ د دې ډول ورکشاپونو په ارزښت باندې خبرې وکړې او له جهان پوهنتون سره یې د افغانستان بانک د همکاریو په دوام ټینګار وکړ.
د ورکشاپ په اوږدو کې د افغانستان بانک د پولي سیاست د لوی آمریت مرستیال ښاغلي عبدالله مسعود د پولي سیاست د طرح، تطبیق او اجراء کولو، د بیو د ټیکاو، د انفلاسیون د کنټرول او د هېواد د اسعاري زېرمو د مدیریت په برخو کې د ورکشاپ ګډون والو ته پریزنټیشن وړاندې کړ او د پولي سیاست د ابزارونو، په ګردښت کې د پیسو او د پولي زېرمو او داسې نورو اړوندو مواردو په برخه کې هر اړخیز بحث ترسره کړ.
په همدې ترتیب د افغانستان بانک د مالي چارو د څارنې د لوی آمریت د ساحې دننه څارنې مدیر ښاغلي حسیب الله بهنورد د پریزنټیشن د وړاندې کولو ترڅنګ د مالي چارو د څارنې د موخو او دندو په برخه کې د بانکونو، صرافانو او د پولي خدمتونو د وړاندې کوونکو د څارنې د طریقې او د کړنو له پلوه د بانکونو د ډله بندۍ د څرنګوالي په اړه له ګډونوالو سره هر اړخیز معلومات شریک کړل.
یاد ورکشاپ د محصلینو او مسؤولینو په پوښتنو او ځوابونو او ګډونوالو ته د تصدیق لیکونو په وېشلو باندې پای ته ورسیده.
