د شمال زون صرافانو او د پولي خدمتونو وړاندې کوونکو ته د روزنې او پوهاوي پروګرام جوړ شو
بلخ د 1398 کال د سلواغې 15 - د هېواد صرافانو او د پولي خدمتونو وړاندي کوونکو ته د روزنیزو پروګرامونو د دوام په لړ کې د افغانستان بانک د غیر بانکي مالي موسسو د څارنې د لوی آمریت لخوا په بلخ ولایت کې هم "د صرافانو او د پولي خدمتونو وړاندې کوونکو د تنظیم مقررې روزنه او د صرافیو او د انفرادي پولي خدمتونو حقوقي جوړښت د صرافۍ او پولي خدمتونو پر شرکتونو بدلول" تر عنوان لاندي روزنیز پروګرام جوړ شو.
دا پروګرام د افغانستان بانک د شمال زون د آمریت معاون او سرپرست ښاغلي محمد اسرار پویا لخوا پرانیستل شو. ښاغلي پویا د دې پروګرام د جوړولو د موخو او ارزښت په تړاو معلومات وړاندې کړل.
ورپسې د صرافانو او پولي خدمتونو د وړاندې کوونکو د څارنې لوی مدیر ښاغلي شاه پور میاخیل د څارنې د موخو، مسوولیتونو، مکلفیتونو او د صرافانو او د پولي خدمتونو وړاندې کوونکو د مجازو او منع شوو کړنو په اړه اړین توضیحات ورکړل.
د یادونې وړ ده چې په دې پروګرام کې د پیسو وینځلو او د ترهه ګرۍ د تمویل، د صرافیو او د پولي خدمتونو موسسو لپاره د جواز اخیستلو، د صرافۍ او پولي خدمتونو د مقررې په تړاو د وروستیو تعدیلاتو په اړه هم هراړخیزې خبرې وشوې.
د دې پروګرام د جوړولو په مراسمو کې د پولي خدمتونو د وړاندې کوونکو، د مزارشریف د ښار، د حیرتانو ښارګوټي او د سمنګانو د ولایت صرافانو، او د سوداګریزو بانکونو د څانګو، د سوداګرۍ او صنعت خونې او نورو سیمه ایزو ادارو مدیرانو په ګډون ۲۸۰ تنو ونډه اخیستې وه.
په دې پروګرام کې د صرافانو د ټولنې رییس د ورته پروګرامونو جوړول ګټور وبلل او د دې پروګرامونو د جوړولو په برخه کې د افغانستان بانک د لا زیاتو همکاریو غوښتونکی شو. ورپسې د غیربانکي مالي موسسو د څارنې د لوی آمریت لخوا ګمارل شوي پلاوي د صرافانو او د پولي خدمتونو د وړاندې کوونکو غوښتنې او نظرونه واوریدل او ورته یې لازم ځوابونه وړاندې کړل.
پاتې دې نه وي چې د افغانستان بانک هر کال په ټول هېواد کې د صرافانو او د پولي خدمتونو د وړاندې کوونکو د ظرفیت او پوهاوي لوړولو لپاره د اړونده قوانینو او مقررو د رعایتولو او پلي کولو لپاره بېلابېل او ګڼ پروګرامونه جوړوي.
