د هېواد ولسمشر د پیسو وینځلو او د ترهګرۍ د تمویل پر وړاندې د مبارزې په اړه د افغانستان بانک راپور واورېد
۱۳۹۹ د کب ۱۶ مه – د هېواد جلالتمآب ولسمشر د افغانستان بانک د سرپرست ښاغلي اجمل احمدي سره په لیدنه کې د پیسو وینځلو او ترهګرۍ د تمویل پر وړاندې د مبارزې او د دې پدېدې د مخنیوي پر لارو چارو او په دې برخه کې د افغانستان بانک د لاسته راوړنو راپور واورېد.
د دې راپور تر اورېدو وروسته ولسمشر د قانون دپلي کوونکو ادارو او د افغانستان بانک تر منځ د دوامداره غونډو پر جوړولو ټینګار وکړ او زیاته یې کړه چې د اړوندو ادارو تر منځ د همغږۍ زیاتوالی کولای شي د پیسو وینځلو او ترهګرۍ د تمویل پر وړاندې مبارزه او له نړیوالو شریکانو سره د کړو ژمنو په عملي کولو کې مرسته وکړي.
د یادونې وړ ده چې د افغانستان بانک د پیسو وینځلو او له جرمونو څخه تر لاسه شویو عوایدو د قانون پر بنسټ تل هڅه کړې څو په هېواد کې یو پیاوړی او له نړیوالو معیارونو سره برابر مالي سیستم رامنځته کړي چې د جنایتکاره ډلو لخوا یې د ناوړه ګټې اخیستنې مخه ونیول شي او د هېواد په اقتصادي پرمختګ کې خپل ارزښتناک رول ولوبوي.
