د هېواد ولسمشر " د ۲۰۲۰ کال د جینیوا د کنفرانس د ژمنو د تطبیق د ورکشاپ" په اوږدو کې د افغانستان بانک د سرپرست لاسته راوړنې وستایلې
۱۳۹۹ د سلواغې ۳۰ – د افغانستان د اسلامي جمهوریت ولسمشر جلالتمآب محمد اشرف غني د ۲۰۲۰ کال د جینیوا د کنفرانس په تعقیبي او د ژمنو د څیړنو په ورکشاپ کې د افغانستان بانک د سرپرست ښاغلي اجمل احمدي کړنې او لاسته راوړنې وستایلې.
د هېواد ولسمشر له نړیوالو دونرانو سره د افغانستان یوه مهمه ژمنه د فساد پر وړاندې مبارزه وګڼله او زیاته یې کړه چې له نېکه مرغه د اداینو د برېښنايي کولو طرحه د افغانستان بانک لخوا په چټکۍ سره د تطبیق په حال کې ده چې په عملي کېدو سره یې مونږ د فساد پر وړاندې د مبارزې په برخه کې یو جدي ګام پورته کوو او د خپلو نړیوالو شریکانو سره د ژمنو په تطبیق کې په ښه توګه عمل کوو. د هېواد ولسمشر د افغانستان بانک د سرپرست ښاغلي اجمل احمدي رول د افغانستان د اداینو په برېښنايي کولو کې ټاکوونکی وباله او له هغه یې مننه وکړه.
د افغانستان بانک د هېواد اداینو د برېښنايي کولو پروسه په چټکۍ سره پلي کوي. د کوچنیو او سترو اداینو د برېښنايي کولو کار تر اوسه پورې شاوخوا ۹۰ سلنه بشپړه شوې او اوس مهال ټول دولتي او خصوصي بانکونه، د مالیې وزارت د عوایدو او ګمرکونو سیستمونه، همدا ډول کابو څلور زره بازارونه او هټۍ له دې سیستم سره نښلول شوي دي.
په نږدې راتلونکي کې به د هېواد د امنیتي او دفاعي ځواکونو د معاشونو اداینه هم له همدې لارې ترسره شي چې د هغوي لپاره ډېره ګټوره اسانتیا ده او د وخت په تیریدو سره به نغدي اداینې چې د پیسو د زړیدو لامل هم کیږي، له منځه ولاړې شي او خپل ځای به برېښنايي اداینو ته پریږدي.
