په ختیځ زون کې د عامه اعتبارونو د ثبت روزنیز ورکشاپ په لاره واچول شو
د افغانستان بانک په ختیځ زون کې د عامه اعتبارونو د ثبت او پر منقولو اموالو د رهني حقوقو د ثبت روزنیز ورکشاپ په لاره واچوه.
د دې ورکشاپ موخه د سوداګرو میرمنو، سوداګرو، صنعت کارانو او خصوصي متشبثینو لپاره د رهني اموالو د حقوقو د ثبت او عامه اعتبارونو د ثبت سیستمونو پېژندل وه.
د عامه اعتبارونو د ثبت عمومي آمر، ښاغلي سید عزیز سادات په یاد ورکشاپ کې د اعتبار د ثبت سیستمونو په اړه خبرې وکړې او په دې اړه یې بشپړ معلومات د دې پروګرام له ګډونوالو سره شریک کړل. نوموړي په خپلو خبرو کې زیاته کړه چې د دې سیستمونو له جوړیدو څخه مخکې د زیاتو ادارو له لورې مالي وجوهو ته لاسرسی ستونزمن وه چې په خبره یې د یادو سیستمونو په جوړیدو سره مالي وجوهو ته لاسرسی زیات شوی دی.
ورپسې د عامه اعتبارونو د ثبت عمومي آمریت مرستیال، عبدالناصر سهاک د دې سیستمونو د کارونې د څرنګوالي او مالي وجوهو ته د لاسرسي د زیاتوالي په موخه د شته اسانتیاوو په اړه معلومات ورکړل.
په ورته وخت کې، په ختیځ زون کې د افغانستان بانک عمومي آمر، احمدزي توحیدیار د عامه اعتبارونو د ثبت سیستم د ګټو په اړه خبرې وکړې او د دا ډول روزنیزو ورکشاپونو جوړول یې خورا ارزښتناک وبلل.
د یادونې وړ ده چې په یاد ورکشاپ کې د ننګرهار ولایت مقام د مرستیال، تمیم عارف سربېره، د سوداګریزو بانکونو استازو او یو شمیر مالي مؤسسو هم ګډون کړی وه.
