په سوداګریزو راکړو ورکړو کې د افغانیو د دودولو هڅې وستایل شوې
کابل، ۱۳۹۸ مرغومې ۲۸ مه– د افغانستان بانک د هېواد د حرفوي سوک وهنې د دوو تنو لوبغاړو او د شپږېزې کرکټ سیالیو پر مهال په سوداکریزو راکړو ورکړو کې د افغانیو د دودولو په برخه کې د افغانستان د کرکټ بورډ ادارې د ویاند هڅې وستایلې.
په هغې غونډه کې چې په همدې مناسبت د افغانستان بانک د عالي شورا په تالار کې جوړه شوې وه، د افغانستان بانک سرپرست او لومړي مرستیال ښاغلي واحدالله نوشېر په سوداګریزو راکړو ورکړو کې د افغانیو دې د دودولو او کارولو په ارزښت خبرې وکړې.
ښاغلي نوشېر په دې برخه کې د حرفوي سوک وهنې د دوو تنو نامتو لوبغاړو هر یو ښاغلي سهیل احمد مغلزي او ښاغلي زمري محمدي او همدارنګه د کرکټ بورډ ادارې د ویاند ښاغلي محمد فرید هوتک هڅې وستایلې.
د یادونې وړ ده چې یادو لوبغاړو هم په دې اړه په خپل نوبت سره خبرې وکړې او په ترڅ کې یې د افغانیو د دودولو په برخه کې د افغانستان بانک د هڅو ستاینه وکړه او له خلکو یې وغوښتل چې په سوداګریزو راکړو ورکړو کې له افغانیو کار واخلي او د پردیو اسعارو له کارولو په کلکه ډډه وکړي.
پاتې دې نه وي چې د افغانستان د کرکټ بورډ ادارې ویاند د شپږیزې سیالیو په لړ کې د سوداګریزو راکړو ورکړو په مهال د افغانیو د دودولو په منډو ترړو کې پراخې هڅې کړې وې.
باید وویل شي چې د افغانستان بانک د دغو لوبغاړو او کرکټ بورډ ادارې د ویاند د خدمتونو، ویاړونو او ورزشي لاسته راوړنو په پام کې نیولو سره یادو کسانو ته ستاینلیکونه او په افغانۍ ښکلي شوي تندیسونه هم ډالۍ کړل.
