د افغانستان نړیوال بانک کارکوونکو لپاره د مشتریانو د حقونو په هکله روزنیز پروګرام جوړ شو
۱۴۴۵ د جمادی الثانی ۱۳ – د افغانستان بانک د مالي خدمتونو د پراختیا لوی آمریت په هڅو د افغانستان نړیوال بانک کارکوونکو او د نمایندګیو مدیرانو لپاره د پیرودونکو د حقونو په هکله روزنیز پروګرام جوړ شو. په دې پروګرام کې، چې په یاد بانک کې ترسره شو، د مشتریانو د حقونو په بیلابیلو اړخونو لکه د پیرودونکو د حقونو اصول، د مشتریانو د مالي حقونو تأمینولو په اړه غوره بین المللې تګلارو، د پیرودونکو شکایاتو ته د رسیدنې او د هغوی د ستونز حلولو د څرنګوالي او نورو اړوندو موضوعاتو په تړاو خبرې اترې وشوې او ګډونوالو ته اړین معلومات وړاندې شول.
همداراز، پر بانکي سکتور د خلکو د باور زیاتولو په برخه کې د مشتریانو د حقونو تأمینولو پر رول او له دې لارې مالي خدمتونو ته د عامه لاسرسي ډیرولو په هکله هم ګډونوالوسره مفصل معلومات شریک شول او پر دې موضوع ټینګار وشو چې د یاد بانک کارکوونکي د پیرودونکو د حقونو اړوند مسائلو ته جدي پاملرنه وکړي او خپلو مشتریانو او د بانک د خدمتونو احتمالي کاروونکو ته اړینې آسانتیاوې برابرې کړي.
د یادونې وړ ده چې د افغانستان بانک د مشتریانو د حقونو تأمینولو او پر بانکي سکتور د خلکو باور زیاتولو په برخه کې له هیڅ ډول هڅو دریغ نه دی کړی او د افغانستان بانک د پلانونو پر بنسټ به دا ډول پروګرامونه په نورو ادارو کې هم ترسره شي.
