له سوداګرو او صنعتکارانو سره غونډه
۱۴۰۰ د وږي ۱۵ مه – د افغانستان بانک د دویم مرستیال ښاغلي عبدالقدیر احمد په مشرۍ له یو شمېر سوداګرو او صنعتکارانو سره غونډه جوړه شوه.
په دې غونډه کې په مالي او بانکي چارو کې د سوداګرو او صنعتکارانو ستونزې او وړاندیزونه واورېدل شول او د نظرونو تبادله تر سره شوه.
د دې غونډې په اوږدو کې د افغانستان بانک دویم مرستیال د هېواد د سوداګرۍ او صنعت په برخه کې د سوداګرو او صنعتکارانو له هڅو ستاینه وکړه او ژمنه یې وکړه چې د قوانینو او مقرراتو په رڼا کې به د دوی هر ډول مالي او بانکي ستونزو ته رسېدنه وشي.
د یادونې وړ ده چې د افغانستان بانک په هېواد کې د مالي او بانکي نظام د پیاوړتیا لپاره ژمن دی او هڅه کوي چې په دې برخه کې د سوداګرو او صنعتکارانو لپاره اړینې آسانتیاوې رامنځته کړي.
