هېواد ته د ۴۰ میلیونه امریکايي ډالرو د نغدې کڅوړې را رسېدل
۱۴۴۴ د ربیع الثاني ۷ مه – افغانستان ته د بشر پاله هېوادونو د مرستو په لړ کې نن د ۴۰ میلیونه امریکايي ډالرو نغده کڅوړه را ورسېده او په کابل کې یو سوداګریز بانک ته وسپارل شوه. دا په روانه اونۍ کې دویمه کڅوړه ده چې هېواد ته را رسېږي.
د افغانستان بانک هېواد ته له قانوني او اصولي لارو د اسعارو له راتګ څخه قدر داني کوي او د نړيوالې ټولنې له مرستو د مننې تر څنګ له مرسته کوونکو هېوادونو غواړي چې په نورو بانکي برخو کې هم له افغانستان سره تعامل ولري.
د افغانستان بانک مشرتابه په دې باور دی چې د بانکي سکتور له لارې د بشر پاله مرستو ترسره کول روڼتیا رامنځته کوي او خلکو ته د بشري مرستو رسولو په برخه کې آسانتیاوې راولي.
