د پولي خدمتونو او صرافيو د شرکتونو جواز ورکولو په تړاو د افغانستان بانک اعلاميه!
د افغانستان اسلامي امارت کابينې د ۱۶ ګڼې او۰۶/۱۰/۱۴۰۰ نېټې مصوبې او د افغانستان بانک عامل پلاوي د ۱۰۶ ګڼې او ۲۸/۱۰/۱۴۰۰ نېټې تصویب پر بنسټ؛ د پولي خدمتونو او صرافيو شرکتي جوازونه د مقرراتي شرايطو او یو لړ نورو شرایطو پر مټ کوم چې په دې ورستيو کې د افغانستان بانک لخوا وضع شوي، صادرېږي.
پر همدې بنسټ، ټول انفرادي صرافان او د پولي خدمتونو وړاندې کوونکي کولای شي د لاندې لارښوود پر بنسټ د پولي خدمتونو او صرافيو د فعاليت د شرکتي جواز د ترلاسه کولو په موخه د افغانستان بانک د جواز ورکولو مديريت ته مراجعه وکړي:
۱- هغه صرافان او د پولي خدمتونو وړاندې کوونکي چې د جواز د ترلاسه کولو لپاره يې مخکې غوښتنليکونه وړاندې کړي وي، اړ دي چې د دې خبرتيا د خپرېدو له نېټې څخه د ۱۴۰۰ کال د کب تر ۱۰ نېټې پورې د جواز د ترلاسه کولو لپاره د جواز ورکولو مدیریت ته مراجعه وکړي.
۲- جواز نه درلودونکي صرافان او د پولي خدمتونو وړاندې کوونکي اړ دي چې د دې خبرتيا د خپرېدو له ڼېټې څخه د ۱۴۰۰ کال د کب تر ۱۰ نېټې پورې د جواز ورکولو مدیریت ته مراجعه او خپل جوازونه ترلاسه کړي.
۳- هغه انفرادي صرافان او د پولي خدمتونو وړاندې کوونکي چې د جواز د اعتبار نېټه یې پای ته رسیدلي وي، اړ دي چې د دې خبرتيا د خپرېدو له نېټې څخه د ۱۴۰۰ کال د کب تر ۱۸ نېټې پورې د شرکتي جوازونو د ترلاسه کولو په موخه د جواز ورکولو مدیریت ته مراجعه وکړي.
له همدې امله، د موضوع په تړاو د پولي خدمتونو ټولو وړاندې کوونکو او صرافانو ته خبر ورکول کیږي چې د پورته مودو په پام کې نیولو سره د جواز د ترلاسه کولو په موخه د افغانستان بانک د جواز ورکولو مدیریت ته مراجعه وکړي. همدا ډول له ټاکل شوې مودې وروسته د بې جوازه صرافانو او د پولي خدمتونو له وړاندې کوونکو سره قانوني چلند کیږي.
