د افغانستان بانک سرپرست ښاغلي اجمل احمدي د ترکمنستان هېواد له سفیر سره ولیدل
۱۴۰۰ کال د وري ۱۹ مه ـ د افغانستان بانک سرپرست ښاغلي اجمل احمدي د یوې غونډې په اوږدو کې د ترکمنستان هېواد له سفیر سره ولیدل او د دواړو هېوادونو ترمنځ یې پر بېلابېلو اقتصادي موضوعګانو، سوداګریزو اړیکو او بانکي او مالي کړنو باندې بحث او خبرې اترې وکړې.
دا غونډه له نړیوالو او سیمه ایزو ادارو او مؤسسو سره د اړیکو د پیاوړتیا او تنظیم او همدا ډول د معقولو پولي او مالي پالیسیو د طرحې او جوړولو لپاره د معلوماتو د شریکولو په موخه جوړه شوې وه چې په اوږدو کې یې د دواړو هېوادونو ترمنځ د تخنیکي همکاریو ترڅنګ د معلوماتو او تجربو د شریکولو په تړاو بحث او نظرونه تبادله شول.
ښاغلي اجمل احمدي د دوست هېواد ترکمنستان له ښه نیت څخه د مننې ترڅنګ ژمنه وکړه چې افغانستان به د سیمې د یو ستراتیژیک شریک په توګه تل له تاسو سره همکاره وي او د سترو اقتصادي پروژو په پلي کولو او په لاره اچولو کې چې د افغانستان او د سیمې د هېوادونو د هوساینې، سوکالۍ، پرمختګ او پیاوړتیا لامل کیږي، له هیڅ ډول هڅې او هاند څخه دریغ ونکړي.
