د افغانستان بانک د لوړ پوړو کارکوونکو په شتون کې د شتمنیو د ثبت او څېړنې سیمینار جوړ شو
کابل، ۱۳۹۸ د مرغومې ۲۹ – د جمهوري ریاست د چارو ادارې د عمومي ریاست د شتمنیو د ثبت او څېړنې ادارې لخوا د افغانستان بانک د لوړ پوړو کارکوونکو لپاره د شتمنیو د ثبت او څېړنې سیمینار جوړ شو.
د دې سیمینار د پرانیستنې په مراسمو کې د افغانستان بانک دویم مرستیال ښاغلي محمد قسیم رحیمي د شتمنیو د ثبت او څېړنې په اړه خبرې وکړې او زیاته یې کړه چې په دې اړه د معلوماتو شریکول، د روڼتیا او حساب ورکونې په برخه کې چې د افغانستان بانک له بنسټیزو ارزښتونو څخه ګڼل کیږي، لوړ ارزښت لري.
د افغانستان بانک دویم مرستیال د شتمنیو ثبت او څېړنه د اداري فساد پر وړاندې د مبارزې او د رونتیا د رامنځ ته کولو په برخه کې یو ارزښتناک اقدام وباله او له کارکوونکو څخه یې وغوښتل چې پر ټاکلي وخت د خپلو شتمنیو د ثبت فورمې اړوندې ادارې ته وسپاري.
وروسته د شتمنیو د ثبت او څېړنې د ادارې د خپرونو او عامه پوهاوۍ آمر ښاغلي عبدالصبور حبیب په دې برخه کې د افغانستان بانک له هر اړخیزو همکاریو مننه وکړه او د شتمنیو د ثبت او څېړنې د څرنګوالي په اړه یې خبرې وکړې.
هغه د افغانستان بانک له مسؤولینو څخه وغوښتل چې له اداري فساد سره د مبارزې او د سمونونو د بنسټیزه کیدلو لپاره هڅه او په دې برخه کې د شتمنیو د ثبت او څېړنې له ادارې سره د تل په څیر مرسته وکړي.
د یادونې وړ ده چې په دې سیمینار کې د شتمنیو د ثبت او څېړنې په اړه د شمتنیو د ثبت او څېړنې د ادارې د کارکوونکو لخوا د یو پریزینټیشن له لارې هر اړخیزه توضیحات وړاندې شول او د ګډون کوونکو پوښتنو ته ځوابونه وویل شول.
