د افغانیو د دودولو په اړه د ننګرهار له چارواکو سره لیدنه
ننګرهار، د ۱۳۹۸ کال د مرغومي ۲ مه – د افغانستان بانک سرپرست او لومړي مرستیال ښاغلي واحدالله نوشېر په هېواد کې د افغانیو د دودولو په اړه د پیل شویو منډو ترړو په لړ کې ننګرهار ولایت ته سفر وکړ او په دې اړه یې د یاد ولایت له والي ښاغلي شاهمحمود میاخیل او یو شمېر نورو ولایتي چارواکو سره وکتل.
د دې لیدنې په ترڅ کې د افغانستان بانک سرپرست په ننګرهار ولایت کې د افغانیو د دودولو په اړه د پیل شويو هڅو ستاینه وکړه او په دې برخه کې یې د ننګرهار د ولایتي چارواکو له هڅو مننه وکړه.
په دې لیدنه کې د ننګرهار والي ښاغلي میاخېل د افغانستان بانک سرپرست او لومړي مرستیال ته د افغانیو د دودولو په اړه د پیل شوي کمپاین په اړه معلومات ورکړل او په دې برخه کې له یو شمېر شتو ستونزو یې یادونه وکړه، نوموړي هیله وښوده چې د افغانستان بانک به په وخت سره یادو ستونزو ته رسېدنه وکړي، څو پرمټ یې د افغانیو د دودولو په برخه کې د ننګرهار اوسېدونکي له ستونزو سره مخ نه شي.
د افغانستان بانک سرپرست او لومړي مرستیال ښاغلي نوشېر یې په غبرګون کې ژمنه وکړه چې په وخت سره به د دغه ولایت د خلکو یادو ستونزو حل ته ودانګي او پرې به نږدي چې د افغانیو د دودولو په برخه کې کومه ستونزه رامنځته شي.
باید وویل شي چې له تېرو څو اونیو را په دېخوا د ننګرهار په ګډون د هېواد په یو شمېر ولایتونو کې د افغانیو د دودولو لپاره د ولایتي چارواکو له لوري هڅې پیل شوې دي.
پاتې دې نه وي چې د افغانستان بانک سرپرست ننګرهار ولایت ته د خپل سفر په ترڅ کې د صنعت کارانو او صرافانو ټولنو له استازو، هټیوالو، سوداګرو، عامو وګړو او د دې ولایت له امنیتي چارواکو سره د افغانیو د دودولو په اړه هم لیدنه وکړه.
د یادونې وړ ده چې د افغانستان بانک سرپرست او لومړي مرستیال په ننګرهار ولایت کې د افغانیو د دودولو په اړه د پیل شویو هڅو له کبله د یاد ولایت والي ته ستاینلیک هم ورکړ.
