د بایزید روښان پوهنتون د محصلینو لپاره د افغانستان بانک د موخو، دندو او مهمو پالیسیو په اړه یو ورځنی ښوونیز سیمینار جوړ شو
د ۱۴۴۴ ذولقعدة الحرام ۲۴- د افغانستان بانک د خپلو اکاډمیکو همکاریو په لړ کې نن د بایزید روښان پوهنتون محصلینو لپاره د روزنې او پوهاوي یو ورځنی سیمینار جوړ کړ. په دې سیمینار کې د یاد پوهنتون د حقوقو، معالجوي طب، ستوماتولوژۍ او اقتصاد پوهنځیو له ۵۰ څخه زیاتو محصلانو ګډون کړی وو او د افغانستان بانک د مهمو پالیسیو، موخو، دندو او عمومي سیاستونو جوړولو او پلي کولو په اړه پکې ګډونوالو ته هر اړخیز معلومات وړاندې شول.
د سیمینار په پیل کې د بایزید روښان پوهنتون رئیس ښاغلي سید عبدالحکیم حکمت خبرې وکړې او په دې ناسته کې یې د افغانستان بانک د پلاوي د ګډون ستاینه وکړه. همدارنګه، ښاغلي حکمت په اکاډمیکه او د ملي ارزښتونو، په ځانګړي توګه د افغانۍ ترویج او د ملي پیسو له ژر زړیدو څخه د مخنیوي د پوهاوي او عامه ذهنیت روښانه کولو په برخه کې د افغانستان بانک له فعالیتونو څخه د قدردانۍ څرګندونه وکړه.
ښاغلي حکمت د خپلو خبرو په ترڅ کې محصلینو ته وویل چې د افغانیو سمه او خوندي توګه ساتنه زمونږ ملي مسوولیت دی او موږ ټول یې باید د ارزښت په ساتنه او تبلیغ کې ونډه واخلو.
ورپسې د افغانستان بانک د ریاست د دفتر لوی آمریت مرستیال ښاغلي شفیق الله بارز خبرې وکړې او ویې ویل چې د افغانستان بانک یوه عامه اداره ده او له همدې امله یې تل هڅه کړې چې له خلکو، رسنیو، اکاډمیکې ټولنې او د ټولنې ټولو قشرونو سره نږدې اړیکې وپالي. ښاغلي بارز زیاته کړه چې دا ډول سیمینارونه جوړول د معلوماتو شریکولو، حساب ورکولو او روڼتیا په برخه کې د بانک د ستراتیژیکو پلانونو یوه برخه ده او دې ټکي ته يې اشاره وکړه چې تعلیمي او تحصیلي مرکزونه د بانک د هغو مهمو شرکاوو له ډلې څخه دي چې د خلکو د مالي پوهې د زیاتولو په برخه کې مهم رول لوبوي.
د پروګرام په دوام کې د پولي سیاست لوی آمریت مرستیال ښاغلي احمد رحیمي د سیمینار ګډونوالو ته د پولي سیاست جوړولو او پلي کولو، د بیو ټیکاو، د انفلاسیون کنترول او د هېواد اسعاري زیرمو د مدیریت په اړه پریزنټیشن وړاندې کړ او د پولي سیاست د ابزارونو، پولي زیرمې او په ګردښت کې د پیسو او نورو اړوندو موضوعاتو په اړه مفصلې خبرې وکړې.
همداراز، د افغانستان د تادیاتو سیستم رئیس ښاغلي اسدالله مشفق د اداینو سیستم د موخو، دندو او مسوولیتونو، د الکترونیکي بانکوالۍ اهمیت، د کریډیټ کارتونو په مرسته د اداینیزو اسانتیاوو او د غوره او له هر ډول فساد څخه پاکې حکومتوالۍ په برخه کې د یادو کارتونو رول په اړه د یو پریزنټیشن په وړاندې کولو له ګډونوالو سره مفصل معلومات شریک کړل. ښاغلي مشفق وویل، له نېکه مرغه مونږ په تېرو دوو کلونو کې د یاد سیستم د ودې او پراختیا په لاره کې د پام وړ لاسته راوړنې لرلې دي. هغه همدارنګه د نورو اغیزناکو طرحو چې په نږدې راتلونکي کې به جوړې شي، په ځانګړي ډول د ترافیک، پاسپورټ او نورو تادیاتي وجایبو د راټولولو د طرحو په اړه خبر ورکړ.
د سیمینار په پای کې د محصلینو او مسؤلینو پوښتنو ته ځوابونه وویل شول او ګډونوالو ته تصدیق لیکونه ډالۍ شول.
