د افغانستان بانک په نوښت د ملي او نړیوالو ادارو په ګډون د وړو تمویلونو ملي کنفرانس جوړ شو
۱۴۴۶ د جمادی الاول ۱۱ مه – د افغانستان بانک په نوښت د ملي او نړیوالو ادارو د استازو، د بهرنیو هېوادونو سفیرانو او د ډله ایزو رسنیو د استازو په ګډون په کابل سرینا هوټل کې د وړو تمویلونو ملي کنفرانس جوړ شو. د دې کنفرانس موخه د وړو تمویلونو د سکتور وده او پراختیا او د خصوصي او دولتي سکتورونو او ملي او نړیوالو ادارو ترمنځ د همغږۍ او همکارۍ رامنځته کول وو، ترڅو په دې وسیله په هېواد کې د فقر کچه را ټیټه او د دندو د پیدا کېدو لامل شي.
د کنفرانس په پیل کې د افغانستان بانک د ټولو رئیس ښاغلي نور احمد آغا د کنفرانس ګډونوالو ته د ښه راغلاست ویلو او د مننې ترڅنګ یې د وړو تمویلونو پر اهمیت خبرې وکړې او زیاته یې کړه چې واړه تمویلونه مالي پانګې ته د اشخاصو او تشبثاتو د لاسرسي د برابرولو له لارې، د کاري فرصتونو د رامنځته کولو، د بې وزلۍ کمولو او د ټولنو د پیاوړي کولو په برخه کې بنسټیزه ونډه لري چې دا کار له یوې خوا د کوچنیو کاروبارونو او محلي تولیداتو د ودې لامل کیږي او له بلې خوا خلکو ته اقتصادي فرصتونه او عایداتي سرچینې برابروي.
ښاغلي نور احمد آغا د خپلو خبرو په بله برخه کې وویل چې د هېواد په اقتصاد کې د وړو تمویلونو د سکتور د اهمیت په پام کې نیولو سره، د افغانستان بانک د دې سکتور د کړنو د تنظیم او څارنې لپاره مقرراتي چوکاټ جوړ کړی دی چې اوسمهال د وړو تمویلونو مؤسسې کولای شي د اړوندو مقرراتو په رڼا کې د فعالیت جواز ترلاسه کړي او د هېواد په اقتصادي وده او رغښت کې خپله ونډه ترسره کړي.
ورپسې، د ریاست الوزراء اقتصادي مرستیال قدرمن الحاج ملا عبدالغني برادر آخند د افغانستان بانک له رهبرۍ څخه د مننې کولو ترڅنګ د بانکي سکتور د اغېزناک مدیریت، مالي ثبات او د افغانۍ ارزښت ساتلو په برخه کې د افغانستان بانک د مشرتابه د معقولو پالیسیو ستاینه وکړه او همدارنګه د دې کنفرانس پر اهمیت یې خبرې وکړې.
ښاغلي الحاج ملا عبدالغني برادر آخند وویل چې د بې وزلۍ او بیکارۍ کمول او د کاري فرصتونو رامنځته کول د افغانستان اسلامي امارت په مسئولیتونو او لومړیتوبونو کې دي او دا چې د دې سکتور ذینفعان عام خلک، بزګران، بېوزلي او د کوچنیو کاروبارونو خاوندان دي، د دې سکتور د پیاوړتیا لپاره اسلامي امارت او نړیواله ټولنه ګډه موخه لري.
ښاغلي الحاج ملا عبدالغني برادر آخند د خپلو خبرو په بله برخه کې وویل، دولت ژمن دی چې دا سکتور پیاوړی کړي او د مالي تمویلونو سکتور د تنظیم او څارنې لپاره د مقرراتي چوکاټ جوړول یې د دې سکتور د پراختیا په برخه کې یو بنسټیز ګام یاد کړ.
د دې کنفرانس په دوام کې د بهرنیو چارو وزیر ښاغلي مولوي امیر خان متقي د وړو تمویلونو د سکتور په وده کې د بهرنيو شریکانو د رول او اهمیت په اړه خبرې وکړې. ورپسې، د افغانستان لپاره د ملګرو ملتونو د سازمان د سرمنشي ځانګړې استازې آغلې روزا اتونبایوا په نورو هېوادونو کې د وړو تمویلونو د سکتور پر رول او په افغانستان کې د وړو تمویلونو سکتور په برخه کې د نړیوالې ټولنې او د ملګرو ملتونو د ادارو د همکاریو په اړه خبرې وکړې او زیاته یې کړه چې نړیواله ټولنه او د ملګرو ملتونو ادارې ژمنې دي چې د افغانستان د وړو تمویلونو سکتور د پرمختګ لپاره له کورنیو ادارو سره په ګډه همکاري وکړي. آغلې اتونبایوا زیاته کړه چې نړیوال بانک په افغانستان کې د وړو تمویلونو د پروژو پلي کولو لپاره ځانګړی پروګرام په پام کې لري او د ملګرو ملتونو د ګډونوالو او پناه غوښتنکو چارو اداره ژمنه ده چې د دې سکتور د پروژو په اړه خپل پلان پراخ کړي.
ورپسې، د افغانستان د مالیې وزارت د پالیسۍ مرستیال ښاغلي انجینر سلطان محمد زبیر د دې سکتور لپاره د دولت د مالي سرچینو د کارولو او د صنعت او سوداګرۍ وزیر ښاغلي الحاج نورالدین عزیزي په بېلابېلو سکتورونو کې د وړو تمویلونو د سکتور د ملاتړ په موخه د لویو شرکتونو د رول په اړه په خپل وار خبرې وکړې.
د دې کنفرانس په بله برخه کې د افغانستان بانک لومړي مرستیال ښاغلي صدیق الله خالد په افغانستان کې د وړو تمویلونو سکتور د فرصتونو او ننګونو په اړه هر اړخیز پریزنټېشن وړاندې کړ. ورپسې د شرایطو وړ شرکتونو ته د جواز ورکولو د مراسمو ترڅنګ د بېلابېلو ګردي میزونو (پینلونو) له لارې د بحث او خبرو اترو زمینه برابره شوه چې په دې کنفرانس کې د وزارتونو، خصوصي بانکونو او د ملي او نړیوالو ادارو د متخصصینو، سلاکارانو او استازو ترمنځ د وړو تمویلونو سکتور په پیاوړتیا کې د شرکتونو، بانکونو او له هېواد څخه بهر سوداګرو د ونډې، د دې سکتور په پیاوړتیا کې د نړیوالو مؤسسو پر رول او په هېواد کې د وړو تمویلونو د سکتور د فرصتونو او ننګونو په اړه بحثونه ترسره او نظرونه تبادله شول.
د دې کنفرانس جمع بندي د افغانستان بانک د ریاست د دفتر لوی آمر ښاغلي فدا محمد فیضان لخوا تر سره شوه. ښاغلي فیضان د ګډونوالو له ګډون او اغېزناکو نظرونو څخه د مننې ترڅنګ د وړو تمویلونو ملي کنفرانس د دې سکتور د پراختیا او ودې لپاره ګټور یاد کړ او زیاته یې کړه چې د افغانستان بانک به په خپل وار د وړو تمویلونو سکتور په پیاوړتیا کې اغېزناکه او دوامداره هڅې کوي.
