د هېواد د معتبره پوهنتونونو له څو تنو استادانو سره د افغانستان بانک په نوښت د پولي سیاستونو په تړاو د ناستې جوړول
کابل، ۱۴۴۳ ذوالقعده ۱۵ مه - د افغانستان بانک د پولي سیاستونو د طرحې او پلي کولو په تړاو له علمي ټولنې سره د اړیکو د ټینګښت او دوام د اصل او د اقتصاد پوهنځي د مالي او بانکي چارو د استادانو له نیکو نظرونو څخه د ګټې اخیستنې په پام کې نیولو سره د اکاډمیکې ټولنې له څو تنو استادانو سره ناسته ترسره کړه.
د دې پروګرام د جوړولو موخه د شته شرایطو په پام کې نیولو سره د پالیسیو د اعتبار د پیاوړي کولو او د ګټورو او اغیزناکو پروګرامونو د طرحه کولو په تړاو د اقتصاد پوهنځي د علمي کادرونو او استادانو بحث او د نظرونو تبادله او د لید لورو ترلاسه کول ګڼل کیږي.
د افغانستان بانک د لوی ریاست سرپرست ښاغلي حاجي ادریس د ناستې په پرانیستیزې وینا کې وویل چې د افغانستان بانک او تحصیلي ادارو ترمنځ اړینه همغږي شته چې مرکزي بانک ورته بشپړ ارزښت ورکوي، په ځانګړې توګه هغه مهال چې د پوهنتونونو د پوهو کادرونو علمي او اغیزناکه لیدلوري، د پروګرامونو او د پولي سیاستونو په طرحه کولو باندې مثبتې اغېزې ولري. په همدې موخه د افغانستان بانک پرېکړه وکړه، څو د شرایطو په پام کې نیولو سره، د پولي سیاست د طرحه کولو، پلې کولو او تر لاس لاندې نیولو په اړه ناسته وکړي.
وروسته د افغانستان بانک د پولي سیاست د لوی آمریت مرستیال ښاغلي عبدالله مسعود د پولي سیاستونو د طرحې، پلي کولو او اجراء کولو په تړاو هر اړخیز پریزنټیشن وړاندې کړ او د بحث ګډونوالو څخه يې د ګټورو نظرونو غوښتنه وکړه.
ورپسې د آزاد بحث او د نظرونو د تبادلې زمینه برابره شوه چې په پیل کې د افغانستان بانک د اقتصادي چارو ستر سلاکار ښاغلي لطف الحق نور پسرلي د پوهنتونونو د استادانو لیدلوري مهم وګڼل او ويې ویل، د افغانستان بانک ټولو استادانو ته ډاډ ورکوي چې د پولي سیاستونو د طرحې او پلي کولو په برخه کې ستاسو د رغنده او اغېزمنو نظرونو هرکلی کوي او له دې نظرونو به ګټه پورته کړي.
همدارنګه، ښاغلي پسرلي زیاته کړه، د نیکمرغۍ ځای دی چې نن مونږ د خپلو هېوادوالو له مسلکي او وړ کادرونو سره د ناستې شاهدان یو چې د خلکو له درد سره اشنا دي او په فکر او هڅو به یې ستونزو ته د حل لاره پیدا کړو.
ورپسې د افغانستان بانک د پولي سیاست آمر، ښاغلي احمد جواد سداد د پولي سیاست د ابزارونو، د پولي سیاست د اډانې او د اسعاري رژیمونو د ډولونو او د بازار عملیاتو لوی آمر ښاغلي عباس سامح د اسعاري زېرمو د مدیریت، د اسعارو او بیه لرونکو پاڼو د لیلامونو په ترسره کولو او د اعتبار لیکونو د صادرولو په اړه خبرې وکړې.
د دې ناستې په دوام کې، رابلل شویو استادانو هر یو په خپل وار د افغانستان بانک له چارواکو سره خپل نظرونه شریک کړل او اوسنیو شرایطو ته په پام کې نیولو سره یې د انفلاسیون په مهارولو او د بهرنیو اسعارو پر وړاندې د افغانۍ د مبادلې نرخ د ټیکاو په ساتلو کې د افغانستان بانک بریالۍ هڅې وستایلې.
باید یادونه وکړو چې په دې پروګرام کې د افغانستان بانک د سرپرست ښاغلي حاجي ادریس سربېره، د ریاست د دفتر لوی آمر ښاغلي صدیق الله خالد، د افغانستان بانک ستر اقتصادي سلاکار لطف الحق نور پسرلي، د پولي سیاست او بازار عملیاتو د لویو آمریتونو آمرینو، د کابل پوهنتون استادانو اجمل آرین او همایون غفوري، د کاردان پوهنتون استادانو سیداجان احمدزي او جوهر مسعودي، د کاتب پوهنتون استاد حسن روحاني، د باختر پوهنتون استادانو عبیدالله ظریفي او افتخارالله غني، د رڼا پوهنتون استاد صدیق الله صادق، د غالب پوهنتون استادانو نصیر احمد ندیم او امام علي سدید او د تابش پوهنتون استاد احمدالله مسلم هم ګډون کړی وو.
