د افغانستان بانک لومړي مرستیال د افغانستان او امریکا د سوداګرۍ خونې له رئیس سره ولیدل
۱۴۴۷ محرم الحرام ۲ مه - د افغانستان بانک لومړي مرستیال ښاغلي صدیق الله خالد په خپل کاري دفتر کې د افغانستان او امریکا د سوداګرۍ د ګډې خونې رئيس ښاغلي جیفري ګریکو سره ولیدل.
په دې غونډه کې د افغانستان د خصوصي سکتور د پیاوړتیا، د سوداګرۍ د ودې او د متقابلو بانکي اړیکو د پراختیا په برخه کې د ګډو همکاریو او یو شمېر نورو اړوندو موضوعاتو په اړه خبرې وشوې.
د افغانستان بانک لومړي مرستیال ښاغلي صدیق الله خالد وویل چې د هېواد بانکي او غیر بانکي مالي سکتورونه د هېواد په اقتصاد کې مهمه ونډه لري او د افغانستان بانک ژمن دی چې د هېواد د اقتصادي ودې په برخه کې له هیڅ ډول هڅو څخه دریغ ونکړي.
ښاغلي خالد د افغانستان بانک لخوا د پیسو وینځلو او د جرمونو څخه د را پیدا شویو عوایدو د مخنیوي د رژیم د پیاوړتیا، د صرافانو او پولي خدمتونو وړاندې کوونکو د سکتور د میکانیزه کولو او په مطلوب حد کې د انفلاسیون د ساتلو په برخه کې ډاډ ورکړ.
نوموړي زیاته کړه چې په تېرو دریو کلونو کې د افغانستان د بانکي سکتور په متقابلو بانکي اړیکو کې ډېر پرمختګ رامنځته شوی، د بانکي سکتور له لوري خلکو ته د مالي تمویلاتو د ورکړې په برخه کې د تېر کال په پرتله ۷۱ سلنه زیاتوالۍ راغلی دی، همدارنګه یوازې په وروستۍ یوه ربع کې په بانکي سکتور کې د امانتونو کچه ۷.۹ میلیارده افغانۍ لوړه شوې ده او د پیسو د نړیوالو لیږدونو په برخه کې ډېرې ستونزې حل شوې دي.
د افغانستان او امریکا د سوداګرۍ ګډې خونې رئیس، ښاغلي جیفري ګریکو، څرګنده کړه چې نړۍ په تېرو دریو کلونو کې د افغانستان د اقتصادي او بانکي سکتورونو د مثبتو بدلونونو شاهده پاتې شوې ده. نوموړي زیاته کړه چې د روان میلادي کال د آګسټ په میاشت کې به د بانکي سکتور د متقابلو اړیکو د پراخېدو په موخه یو کنفرانس جوړ شي، او د افغانستان بانک ته یې په دې کنفرانس د ګډون او وینا بلنه ورکړه.
