د افغانستان بانک مشرتابه پلاوي د عزیزي بنسټ له بنسټګر سره ولیدل
د افغانستان بانک رئیس، ښاغلي نور احمد آغا او لومړي مرستیال ښاغلي صدیق الله خالد د عزیزي بنسټ له بنسټګر ښاغلي میرویس عزیزي سره وکتل او د بانکي سکتور د لا پرمختګ په تړاو یې هر اړخیز بحث ترسره کړ.
په دې لیدنه کې د عزیزي او اسلامي بانکونو د پرمختګ او بهبود په اړه خبرې وشوې او د بانکونو د بشپړ اسلامي کېدو اړوند هر اړخیز بحث ترسره شو. همدارنګه، د افغانستان بانک د مشرتابه پلاوي لخوا نوموړي ته اړینې سپارښتنې وشوې، ترڅو د بانکي خدمتونو د لا ښه والي او د اسلامي بانکوالۍ د ښه پلي کېدو لپاره ګټور ګامونه پورته شي.
ښاغلي میرویس عزیزي د افغانستان بانک د مشرتابه پلاوي له هڅو مننه وکړه او ډاډ یې ورکړ چې په یادو بانکونو کې به اسلامي بانکوالي په بشپړ ډول پلې کېږي، د خلکو باور به پیاوړی کیږي، او په دې بانکونو کې به مثبت تغییر راځي.
د یادونې وړ ده چې په دې غونډه کې د افغانستان بانک د ریاست د دفتر لوی آمر ښاغلي فدا محمد فیضان، د بانکي څارنې او مالي خدمتونو لوی آمر ښاغلي دکتور لطف الله خیرخواه او د دې آمریت مرستیالانو هم ګډون درلود.
