د خواخوږۍ او ډاډګیرنې پیغام

اِنّا للّه وَ اِنّا اِلَیْهِ راجِعوُن

نن سهار پر اوو بجو او پنځه څلوېښت دقیقو ( ۷:۴۵) د افغانستان بانک د کارکوونکو پر موتر بمي چاودنه وشوه چې له امله یې د دې بانک درې کارکوونکي هر یو د افغانستان بانک د ریاست دفتر د لوی آمریت د عامه اړیکو سلاکار یما سیاوش، د افغانستان بانک د ریاست د دفتر د لوی آمریت مرستیال احمدالله انس او د دوی د موتر چلوونکی امین الله رضایي په شهادت ورسېدل.

د افغانستان بانک مشرتابه پلاوی او کارکوونکي پر ډېرو سختو ټکو د دې ترهګریزې پېښې د غندلو او محکومولو تر څنګ د خپلو همکارانو شهادت یوه لویه تشه بولي او له همدې امله خپله خواشیني، ډاډګیرنه او خواخوږي د شهیدانو له کورنیو، دوستانو او همکارانو سره شریکوي او د خدای (ج) له دربار څخه ورته د جمیل صبر او پوره زغم غوښتنه کوي.

د شهیدانو روح د ښاد او یاد دې تلپاتې وي!

په درنښت

د افغانستان بانک مشرتابه

د شهیدانو ژوند لیک

یما سیاوش

یما سیاوش د محمد داوود زوی چې د کاپیسا ولایت په کوهستان ولسوالۍ کې زېږیدلی ؤ. نوموړي د حقوقو او سیاسي علومو په څانګه کې د لیسانس تر کچې زده کړې کړې وي. له تېرې یوې لسیزې را په دېخوا یې له بېلابېلو رسنیو سره یېدنده تر سره کړې وه. سیاوش په دې وروستیو کې د افغانستان بانک د ریاست د دفتر د لوی آمریت د عامه اړیکو برخې د سلاکار په توګه دنده تر سره کوله.

احمدالله انس

احمدالله انس د رحمت الله چې د انجنیرۍ په څانګه کې لیسانس او اداره او سوداګرۍ کې یې ماستري درلود، له بېلابېلو دولتي او غیر دولتي ادارو سره یې دندې تر سره کړې دي او په دې وروستیو کې د افغانستان بانک د ریاست د دفتر د لوی آمریت د اجرائیو او پروتوکول برخې د مرستیال په توګه دنده تر سره کوله.

امین الله رضایي

امین الله رضایي د رحمت الله چې نوموړی په ۱۳۸۹ لمریز کال کې د عبدالرحیم شهید له لیسې څخه فارغ شوی دی. نوموړي له ۱۳۹۳ لمریز کال را په دېخوا د افغانستان بانک د ترانسپورت په برخه کې د موټر چلوونکي په توګه دنده تر سره کوله.