د صرافانو او پولي خدمتونو د وړاندې کوونکو لپاره معلوماتي ورکشاپ جوړ شو
کابل، ۱۳۹۸ کال د لړم ۲۸ مه – د افغانستان بانک د څارنې د لوی آمریت له لوري د کابل ښار هغه صرافانو ته چې د اسعارو د لیلام په پروسه کې ګډون کوي روزنیز ورکشاپ جوړ شو.
په دې ورکشاپ کې د صرافیو او پولي خدمتونو وړاندې کوونکو ته د معاملو د ترسره کولو په مهال د قانون او مقررو په رڼا کې د اړوندو اسنادو د تر لاسه کولو او د دوی د معاملو څخه د یاد آمریت د څارنې د څرنګوالي په اړه معلومات ورکړل شول.
د ورکشاپ په ترڅ کې د څارنې د لوی آمریت له پولي خدمتونو او صرافیو څخه د څارنې مدیر ښاغلي شاپور میاخیل وویل چې د صرافیو او پولي خدمتونو له معاملو څخه د څارنې موخه د روڼتیا رامنځته کول دي.
نوموړي زیاته کړه یاد آمریت د لومړي ځل لپاره د اسعارو د لیلام په برخه کې د ګډون کوونکو صرافانو او پولي خدمتونو د وړاندې کوونکو له چارو د څارنې لړۍ پیلوي. د ښاغلي میاخېل په خبره په دې سره به د صرافیو او پولي خدمتونو په چارو کې آسانیتاوې او پرمختګونه رامنځته شي.
باید وویل شي چې د یاد ورکشاپ ګډونوالو هم په دې اړه خپلې پوښتنې، وړاندیزونه او نظرونه د دې آمریت له کارکوونکو سره شریک کړل او د دوی پوښتنو ته ځوابونه وویل شول.
د یادونې وړ ده چې په دې ورکشاپ کې د افغانستان بانک د څارنې د لوی آمریت د یو شمېر کارکوونکو سربېره ۷۰ تنه صرافانو او د پولي خدمتونو وړاندې کوونکو ګډون کړی وو.
