د افغانستان بانک لومړي مرستیال او د ملګرو ملتونو د پرمختیايي پروګرام د استازي ترمنځ الوداعي غونډه ترسره شوه
۱۴۴۸ د محرم الحرام ۱۵ مه - د افغانستان بانک لومړي مرستیال ښاغلي صدیق الله خالد او په افغانستان کې د ملګرو ملتونو د پرمختیايي پروګرام استازي ښاغلي سټیفن روډریګز او ورسره مل پلاوي ترمنځ د افغانستان بانک د عالي شورا په تالار کې الوداعي غونډه ترسره شوه.
په دې غونډه کې د افغانستان بانک لومړي مرستیال ښاغلي صدیق الله خالد په افغانستان کې د ملګرو ملتونو پرمختیايي فعالیتونه او په ځانګړې توګه د وړو مالي تمویلاتو په برخه کې د ملګرو ملتونو د پرمختیايي پروګرام استازي ښاغلي سټیفن روډریګز له هڅو څخه مننه وکړه. ښاغلي خالد وویل چې د افغانستان بانک په هېواد کې د ملګرو ملتونو پرمختیايي فعالیتونو او د وړو مالي تمویلاتو سکتور ته د ودې ورکولو په برخه کې هڅې او ژمنتیا ستايي. هغه زیاته کړه چې د افغانستان بانک ژمن دی چې د دې سکتور د ودې لپاره له ملي او نړیوالو ادارو سره په ګډه کار وکړي او د اسلامي مالي تمویلاتو خدمتونه ټول افغانستان ته وغځوي ترڅو د هېواد د اقتصادي پرمختګ او د فقر په کمولو کې رغنده رول ولوبوي.
په افغانستان کې د ملګرو ملتونو پرمختیايي پروګرام استازي ښاغلي سټیفن روډریګز د وړو مالي تمویلاتو د پياوړتیا په برخه کې د افغانستان بانک د مشرتابه او کارکوونکو همکاري او ژمنتیا وستایله او هیله یې څرګنده کړه چې په دې برخه کې همکارۍ دوام ومومي.
د یادونې وړ ده چې ښاغلی سټیفن روډریګز خپله دنده په افغانستان کې پای ته رسوي. هغه د خپلې دندې پر مهال د افغانستان بانک سره په بېلابېلو برخو کې، په ځانګړې توګه د مالي خدمتونو د پراختیا او د وړو مالي تمویلاتو د ودې په برخه کې نږدې همکاري کړې ده. د افغانستان بانک د هغه له هڅو او همکارۍ څخه مننه کوي.
