د افغانستان بانک له سویل لویدیځ زون څخه راټول شوي مندرس بانکنوټونه وسوځول
د ۱۴۴۷ کال د جمادي الثاني ۶ مه - د افغانستان بانک له اړوندو کړنلارو سره سم د ۴۰۵،۸۹۲،۰۰۰ (څلور سوه پنځه میلیونه او اته سوه دوه نوي زره) افغانیو په ارزښت له سویل لویدیځ زون څخه راټول شوي د افغانۍ زاړه بانکنوټونه د افغانستان بانک دویم مرستیال ښاغلي مُلا محمد آخند په مشرۍ د ګمارل شوي پلاوي تر څارنې لاندې له کره شمېرنې او کنټرول څخه وروسته په کندهار ولایت کې وسوځول شول. په دې بانکنوټونو کې د (۱۰،۲، ۲۰، ۵۰، ،۱۰۰۰،۵۰۰،۱۰۰) افغانیو انواعیې شاملې وې.
د افغانستان بانک دویم مرستیال ښاغلي مُلا محمد آخند وویل چې دافغانستان بانک په راکړو ورکړو کې د آسانتیاوو رامنځته کولو په موخه وخت په وخت د افغانۍ زاړه بانکنوټونه له بازار څخه راټولوي او په بدل کې یې هېوادوالو ته نوي بانکنوټه وېشي چې مندرس بانکنوټونه د اړوندو مقرراتو په رڼا کې سوځول کیږي. ښاغلي مُلا محمد آخند له هېوادوالو څخه وغوښتل چې د افغانۍ د بانکنوټونو سمې ساتنې او کارَونې ته ډېره پاملرنه وکړي ځکه چې د نویو بانکنوټونو پر چاپ ډیر لګښت راځي. هغه زیاته کړه چې په ککړو لاسونو د بانکنوټونو له شمېرلو څخه ډډه کول او له ځان سره د افغانۍ د ساتلو لپاره د بټوو کارول کولای شي چې له ټاکلې مودې څخه مخکې د بانکنوټونو له زړېدو څخه مخنیوی وکړي.
د یادونې وړ ده چې دا بانکنوټونه د عدلیې او مالیې وزارتونو او د امنیتي ادارو استازو په شتون کې له بارولو څخه وروسته د ټاکل شوي پلاوي لخوا مخصوصو بټیو ته لیږدول کیږي او په یو وار سوځول کیږي.
