د عامل پلاوي تر مشرۍ لاندې غونډه
کابل، د ۱۳۹۸ کال د تلې ۲ مه – د افغانستان بانک د عامل پلاوي په مشرۍ د دې بانک د بېلابېلو آمریتونو د آمرینو او مرستیالانو ګډه غونډه جوړه شوه.
په دې غونډه کې د افغانستان بانک په اډانه کې د اداري اصولو د په پام کې نیولو، د مسلکي فضا په رامنځته کولو او د یو ټیم په حیث د بانک لومړنیو اهدافو ته د رسېدو په اړه خبرې اترې وشوې.
په یاده غونډه کې د افغانستان بانک سرپرست او لومړي مرستیال ښاغلي واحدالله نوشېر د بانک اصولو ته پاملرنه د خورا ارزښت وړ یاده کړه او دې اصولو ته په ژمنتیا یې ټینګار وکړ.
په همدې حال کې د افغانستان بانک دویم مرستیال ښاغلي محمد قسیم رحیمي هم خبرې وکړې او یادونه یې وکړه چې موږ ټول د یو ټیم په توګه د واحد هدف لپاره کار کوو او په کار ده چې په چارو کې پوره همغږي شتون ولري.
