د افغانستان او ترکمنستان تر منځ د اتو اقتصادي پروژو د همکاریو په اړه د تخنیکي مذاکرو او نظرونو د تبادلې دوام
د ۱۴۰۰ کال د غبرګولي د میاشتې په ۱۵ مه نېټه د شنبې په ورځ د افغانستان حکومت لوړ پوړي پلاوي په هرات ولایت کې د ترکمنستان هېواد له لوړ پوړي پلاوي سره چې هرات ولایت ته یې د ترکمنستان هېواد د بهرنیو چارو د وزیر ښاغلي رشید میردوف په مشرۍ سفر کړی ؤ، ولیدل او د دواړو هېوادونو تر منځ په بېلابېلو اقتصادي، فرهنګي، سیاسي او د سیمهایزې نښلونې په برخه کې د ستراتیژیکو اړیکو پر پراختیا بحث او نظرونه تبادله شول.
په هغه غونډه کې چې په همدې موخه جوړه شوې وه د افغانستان او ترکمنستان د سکتوري ادارو استازو د سوداګرۍ، ترانسپورت، غاز او برېښنا د لېږد ( تپ او تاپي) او د دواړو هېوادونو د بېخبنسټیزو پروژو د پراختیا په تړاوخبرې او نظرونه شریک کړل.تمه کېږي چې د اوسپنې پټلۍ (تورغنډۍ – صنوبر)، برېښنا، غاز، د مرمر ډبرو او صنعت په ګډون د اتو مهمو اقتصادي پروژو په برخه کې پر همکاریو هوکړه وشي.
په هغه پلاوي کې چې هرات ولایت ته یې سفر کړئ دی، د بهرنیو چارو د وزیر ښاغلي محمد حنیف اتمر سربېره، د افغانستان بانک سرپرست ښاغلی اجمل احمدي، د کانونو او پترولیم وزیر ښاغلی هارون چخانسوري، د افغانستان برېښنا شرکت رئیس ښاغلی داوود نورزی، د خصوصي سکتور استازی ښاغلی محمد اسماعیل غضنفر، د مالیې، سوداګرۍ او صنعت او ترانسپورت وزارتونو مرستیالانو او واک لرونکو استازو، د جمهوري ریاست د حقوقي واحد، د چارو د ادارې د پانګونې واحد او د اوسپنې پټلۍ د ادارې استازي هم ګډون لري.
