د اقتصادي همکارۍ او پراختیا سازمان (OECD) په غونډه کې د افغانستان بانک د سرپرست ګډون
۱۴۰۰ کال د چنګاښ ۱۵ مه – د افغانستان بانک سرپرست ښاغلي اجمل احمدي د یو ویډیو کنفرانس له لارې د اقتصادي همکارۍ او پراختیا سازمان په غونډه کې ګډون وکړ او د هېواد د اداینو د سیستمونو د برېښنایي کولو او په دې برخه کې یې په نورو جوړښتي سمونونو یې خبرې وکړې.
په دې غونډه کې د افغانستان بانک سرپرست ښاغلي اجمل احمدي د اداینو د برېښنایي کولو پر ارزښت او د سوداګریزو مالونو د ترخیص د پروسې پر چټکتیا، له فساد څخه په مخنیوي او د خصوصي سکتور د کار او بار پر پراختیا خبرې وکړې، ژمنه یې وکړه چې له وړاندې د ټاکل شوي پلان پر بنسټ به د افغانستان د اداینو سیستم د برېښنایي کولو لپاره هلې ځلې کوي او د هېواد مالي او د اداینو نظام به پر نړیوالو منل شویو معیارونو برابروي.
ورپسې د اروپایي هېوادونو ګډونوالو چې په دې غونډه کې یې ګډون کړی وو، په خپلو هېوادونو کې د اداینو د برېښنایي کولو له تجربو، په دې برخه کې له نویو پرمختګونو له تکنالوژۍ څخه چې وکولای شي د هېوادونو تر منځ د سوداګریزو راکړو او ورکړو په برخه کې آسانتیاوې رامنځته کړي یادونه وکړه، ژمنه یې وکړه چې په دې برخه کې به له افغانستان سره خپلې تخنیکي مرستې او معلومات شریکوي.
