د ۱۴۰۰ مالي کال په اوږدو کې د افغانستان بانک د عالي شورا د دویمې غونډې جوړیدل
۱۴۰۰ کال د چنګاښ ۱۳ ـ د افغانستان بانک عالي شورا چې د دې بانک د تصمیم نیولو تر ټولو غوره مرجع ده، نن یې د ۱۴۰۰ مالي کال دویمه نوبتي غونډه جوړه کړه.
دا غونډه د افغانستان بانک د لوی ریاست د سرپرست ښاغلي اجمل احمدي په مشرۍ او د افغانستان بانک د عالي شورا د نورو غړو به ګډون له لرې واټن څخه په انلاین ډول جوړه شوې.
په دې غونډه کې د افغانستان د اقتصادي وضعیت، د پولي سیاست د پلي کېدو د څرنګوالي، د بانکي نظام د کړنو او د هغه د څارنې، د هېواد د غیر بانکي سکتور د پراختیا او میکانیزه کولو، د اداینو د برېښنايي کولو د بهیر د چټکتیا، د بانکوالۍ سکتور د پراختیا او د افغانستان بانک اړوند د یو شمېر اداري موضوګانو په تړاو بحث او نظرونه تبادله شول او د افغانستان بانک د قانون د حکمونو په رڼا کې لازمې پرېکړې وشوې.
د یادونې وړ ده چې د بانک د عالي شورا د دې غونډې په اوږدو کې د بانک شعبو لپاره دوه نوې کاري کړنلارې هم منظوره شوې او د مخکې منظوره شویو کړنلارو له ډلې په ځینو برخو کې تعدیل شوې ۱۸ کاري کړنلارې د بیا لپاره منظورې شوې.
