د ریاست د دفتر، د بانکونو د څارنې او د مرکز زون د آمرینو معرفي کېدل
۱۴۰۰ د وږي ۳۰ مه – د افغانستان بانک ریاست د دفتر د لوی آمریت، د بانکونو د څارنې د لوی آمریت او د مرکز زون د لوی آمریت آمرین د افغانستان بانک د دویم مرستیال ښاغلي عبدالقدیر احمد له لوري د دې بانک کارکوونکو ته ور وپېژندل شول.
د افغانستان بانک دویم مرستیال ښاغلي مولوي عبدالقدیر احمد د یادو کسانو د پېژندنې په غونډه کې دا کسان په کارپوه یاد کړل او د افغانستان بانک له نورو کارکوونکو یې وغوښتل چې له دوی سره په ګډه همکارۍ خپلو چارو ته په پوره رېښتنولۍ سره دوام ورکړي.
ښاغلي احمد زیاته کړه چې یو بل ته د لاس په ورکولو سره به د دې هېواد د جوړونې لپاره کار کوو، ترڅو په ګډه سره دا وطن آباد کړو، ځکه په تېرو شلو کلونو کې له بهر څخه راغلو کسان یوازې د معاش لپاره کار وکړ او هېواد یې په سختو شرایطو کې یوازې پرېښود.
نوموړي د خپلو خبرو په وروستۍ برخه کې نویو پېژندل شویو آمرینو ته په چارو کې د بریالیتوب هیله وښوده او له دوی یې وغوښتل چې تر بل هر وخت زیات د هېواد د اقتصادي او بانکي نظام د پرمختګ لپاره کار وکړي.
د یادونې وړ ده چې د افغانستان بانک د ریاست د دفتر د لوی آمریت لپاره ښاغلی صدیق الله خالد، د بانکونو د څارنې د لوی آمریت لپاره ښاغلی عبدالرحمن قانت او د مرکز زون د لوی آمریت لپاره ښاغلی فدا محمد فیضان د نویو آمرینو په توګه په دندو ګمارل شوي دي.
په یاده غونډه کې د افغانستان بانک د بېلابېلو آمریتونو آمرینو او د دې بانک یو شمېر کارکوونکو هم ګډون کړی وو.
