د عوایدو را ټولونې او اداینو سیستمونو د پراختیا غونډه
د ۱۴۴۵ کال د رجب المرجب ۳ مه – د افغانستان بانک د پالیسۍ ستر سلاکار ښاغلي معراج محمد معراج په مشرۍ د عوایدو راټولونې، اداینو، خلکو ته د غوره خدمتونو د وړاندې کولو او سیستمونو د پراختیا په اړه غونډه جوړه شوه.
په دې غونډه کې د افغانستان بانک د پالیسۍ ستر سلاکار ښاغلي معراج محمد معراج د اړوندو ادارو تر منځ په لا ډېرې همغږۍ او همکارۍ ټینګار وکړ. نوموړي د عوایدو را ټولونې په برخه کې د اداینو سیستمونو پراختیا د ارزښت وړ یاده کړه او دا یې د خلکو لپاره د آسانتیا په پار مهم وبلل.
په یاده غونډه کې د افغانستان بانک او اړوندو ادارو د استازو تر منځ تخنیکي بحثونه تر سره شول او د عوایدو راټولونې او اداینو سیستمونو په برخو کې یې له یو بل سره وړاندیزونه شریک کړل. د افغانستان بانک استازو له خپله اړخه په دې برخه کې د قانون او مقرراتو په رڼا کې د هر ډول همکارۍ ژمنه وکړه.
په دې غونډه کې د افغانستان بانک د استازو سربېره، د اقتصادي معاونیت، مالیې او ښارجوړونې وزارتونو استازو ګډون درلود.
د افغانستان بانک د هېواد د مرکزي بانک په توګه ژمن دی چې د درنو هېوادوالو لپاره په ټولو مالي او بانکي برخو کې د غوره خدمتونو د وړاندې کولو زمینه برابره کړي او له دې لارې د هېواد په اقتصادي رغښت کې خپل مثبت رول تر سره کړي.
