د افغانستان بانک د بانکي څارنې لوی آمر معرفي شو
۱۴۴۶ شعبان المعظم ۲۵ مه – د افغانستان بانک د بانکي څارنې نوی لوی آمر، ښاغلی دکتور لطف الله خیرخواه، نن د افغانستان بانک د لومړي مرستیال ښاغلي صدیق الله خالد له لوري د دې بانک آمرینو او معاونینو ته ور وپېژندل شو.
د غونډې پر مهال، د افغانستان بانک لومړي مرستیال ښاغلي صدیق الله خالد په ادارو کې تغییر او تبدیل د کارکوونکو د چارو یو اصل وباله او یادونه یې وکړه چې په ادارو کې تغییر او تبدیل د چارو د لا ښه سمون په موخه رامنځته کېږي.
نوموړي د خپلو خبرو پر دوام زیاته کړه، مسئولیت یوازې د واک ترلاسه کول نه دي، بلکې د امانت ساتنه، صداقت او د خلکو لپاره د خدمت کول دي او مونږ ټولو ته په کار ده چې مسئولیتونه په ښه ډول تر سره کړو. نوموړي ښاغلي دکتور لطف الله خیرخواه لپاره د بریا هیله څرګنده کړه او له ټولو همکارانو یې وغوښتل چې ورسره نږدې همکاري وکړي، ترڅو د بانکي څارنې بهیر نور هم پیاوړی شي او د هېواد بانکي سکتور ته لا زیاته وده ورکړي.
همداراز، ښاغلي صدیق الله خالد د بانکي څارنې د پخواني آمر ښاغلي شیخ عبدالرحمن قانت، له هڅو او خدمتونو مننه وکړه او د هغه لاسته راوړنې یې په بانکي سکتور کې د نظارتي سیستم د پیاوړتیا لپاره ارزښتناک وبللې.
د یادونې وړ ده هغه غونډه چې په همدې مناسبت، د افغانستان بانک د عالي شورا په تالار کې جوړه شوې وه، پکې د افغانستان بانک دویم مرستیال ښاغلي ملا محمد آخند، د دې بانک د بېلابېلو برخو آمرینو او معاونینو ګډون درلود.
