د صرافانو د یووالي شورا د رهبرۍ له غړو سره د افغانستان بانک د سرپرست لیدنه
۱۴۰۰ کال د چنګاښ ۱۶ مه – د افغانستان بانک سرپرست ښاغلي اجمل احمدي د خپل کار په دفتر کې د صرافانو او پولي خدمتونو د وړاندې کوونکو د شورا د رهبرۍ له غړو سره وکتل او د صرافانو او پولي خدمتونو د وړاندې کوونکو د کړنو د میکانیزه کولو په اړه یې ورسره خبرې وکړي.
په پیل کې د صرافانو او پولي خدمتونو د وړاندې کوونکو شورا رئیس ښاغلي امین جان خوستي د صرافانو او پولي خدمتونو د وړاندې کوونکو په نمایندګۍ خبرې وکړې او د صرافانو او پولي خدمتونو د وړاندې کوونکو ستونزې او وړاندیزونه یې د افغانستان بانک له مشرتابه سره شریک کړل.
ورپسې د افغانستان بانک سرپرست ښاغلي اجمل احمدي خبرې وکړې او ویې ویل چې د افغانستان بانک د بانکونو، صرافیو او پولي خدمتونو د وړاندې کوونکو لپاره د مالي او بانکي سکتور اړوند قانون او مقررو په رڼا کې د مناسب او معیاري بستر د رامنځته کولو لپاره بې درېغه هلې ځلې کوي.
ښاغلي احمدي د خپلو خبرو په بله برخه کې د افغانیو د نرخ د تبادلې په اړه هم خبرې وکړې او یادونه یې وکړه چې د اسعارو نرخ په نړۍ کې د دوو سیستمونو پر بنسټ ټاکل کېږي چې په لومړي سیستم کې حکومتونه نرخ ټاکي او په دویم سیستم کې چې د اسعارو متحول مدیریت شوی نظام دی نرخونه د آزاد بازار او عرضې او تقاضا پر بنسټ ټاکل کېږي.په افغانستان کې د اسعارو متحول مدیریت شوي نظام له سیستم څخه استفاده کوو چې د اسعارو ارزښت په آزاد بازار کې د عرضې او غوښتنې پر بنسټ ټاکل کېږي.
نوموړي د امریکایي ډالرو پر وړاندې د افغانیو د ارزښت د ټیټوالي اصلي لامل امنیتي او سیاسي وضعیت یاد کړ او ویې ویل چې د هېواد اقتصادي شاخصې په غوره حالت کې دي. هغه همدارنګه زیاته کړه چې مونږ کافي اسعاري زیرمې په اختیار کې لرو او بانکي سکتور د غوره حالت لرونکی دی.
ښاغلي احمدي زیاته کړه چې د افغانیو نرخ د ډالرو پر وړاندې زیات بدلون نه دی کړی او د تېرو کلونو په پرتله په ورته سلنه بدلون په کې راغلی دی چې د اندېښنې وړ نه دی. د نوموړي په خبره د افغانیو ارزښت د امریکايي ډالرو پر وړاندې د زیات شمېر ګاونډیو او سیمې د هېوادونو څخه د ټیکاو په غوره حالت کې دی او د ډیری هېوادونو د پولي واحدونو ارزښت د ډالرو پر وړاندې څو ځله را ټیټ شوی دی.
