د افغانستان بانک "له نمایندګۍ پرته د بانکدارۍ" نوی موډل جوړ کړ
کابل، د غبرګولي ۲۲ مه –د افغانستان بانک د مالي او عامه خدمتونو د پراختیا عمومي آمریت د مالي نظارت له عمومي آمریت او د افغانستان د تادیاتو سیسټم سره په ګډه همکارۍ "له نمایندګۍ پرته د بانکدارۍ "نوی موډل جوړ کړی دی.
په هغه غونډه کې چې د مالي او عامه خدمتونو د پراختیا عمومي آمریت له لوري د دې موډل څخه د ګټې اخیستنې د څرنګوالي په اړه جوړه شوې وه،په کې د یاد آمریتد آمر ښاغلي میر احمد شکیب له لوري د غونډې ګډونوالو ته معلومات ورکړل شول.
په دې غونډه کې د سوداګریزو بانکونو استازو د یاد موډل په اړه خپل نظرونه شریک کړل او ټاکل شوې ده چې د یاد موډل مقرره تر بیا کتنې او نهایي کېدو وروسته د افغانستان بانک د عالي شورا له لوري منظور او چارې یې په عملي ډول پیل شي.
د دغه نوښت له مخې سوداګریز بانکونه کولای شي په ولایتونو او لرې پرتو سیمو کې د بانکي خدمتونو د پراختیا لپاره له نمایندګۍ پرته بانکداري رامنځته کړي او خلکو ته د خپلو نمایندګانو په وسیله خدمتونه وړاندې کړي.
د افغانستان بانک تل هڅه کړې څو هېوادوالو ته د مالي خدمتونو په برخهکې پراخې آسانتیاوې رامنځته کړي.
