د سوداګریزو بانکونو له استازو سره غونډه
۱۴۰۰ کب ۱۶ مه – د افغانستان بانک د څارنې آمریت د آمر ښاغلي عبدالرحمن قانت پر مشرۍ د سوداګریزو بانکونو له استازو سره غونډه جوړه شوه.
په یاده غونډه کې د سوداګریزو بانکونو له استازو سره پر اړوندو بانکي موضوعګانو او خلکو ته د بانکي خدمتونو په برخه کې د آسانتیاوو رامنځته کولو په اړه هر اړخیز بحث او د نظرونو تبادله تر سره شوه.
په دې غونډه کې د افغانستان بانک له بانکونو څخه د څارنې آمر ښاغلي عبدالرحمن قانت د سوداګریزو بانکونو له استازو وغوښتل چې خلکو ته د قانون او مقرراتو په رڼا کې اړین بانکي خدمتونه وړاندې کړي. نوموړي زیاته کړه چې د بانکي خدمتونو د پراختیا په برخه کې د افغانستان بانک له سوداګریزو بانکونو سره پوره همکار دی.
د دې غونډې په بله برخه کې د افغانستان بانک د ریاست اقتصادي سلاکار ښاغلي لطف الحق نور پسرلي هم خبرې وکړي او یادونه یې وکړه چې د افغانستان بانک په ټول ځواک سره هڅه کړې ده چې په دې برخه کې شته ستونزې حل او د خلکو لپاره اړینې اسانتیاوې رامنځته کړي. د نوموړي په خبره عادي حالت ته د بانکونو د فعالیتونو د را ګرځولو لپاره هلې ځلې روانې دي او تمه ده چې ډېر ژر به مثبتې پایلې تر لاسه شي.
د یادونې وړ ده چې په یاده غونډه کې د افغانستان د بانکونو ټولنې او سوداګریزو بانکونو استازو هم ژمنه وکړه چې د درنو هیوادوالو لپاره به اړین خدمتونه وړاندې کوي او په دې برخه کې به له هر ډول هلو ځلو درېغ و نه کړي.
