د ماشومانو څخه د ساتنې ادارې له استازو سره غونډه
۱۴۰۰ کب ۱۸ مه – د افغانستان بانک د دویم مرستیال ښاغلي عبدالقدیر احمد پر مشرۍ د ماشومانو څخه د ساتنې ادارې له استازو سره غونډه جوړه شوه.
په دې غونډه کې د افغانستان بانک دویم مرستیال ښاغلي عبدالقدیر احمد له ماشومانو څخه د ساتنې ادارې له استازو مننه وکړه چې د افغانستان د خلکو په ځانګړې توګه له ماشومانو څخه د ساتنې په موخه خدمتونه وړاندې کوي. نوموړي زیاته کړه د افغانستان بانک ژمن دی چې د همکارو بنسټونو لپاره په مالي او بانکي برخو کې اړینې آسانتیاوې برابرې کړي.
ښاغلي عبدالقدیر احمد وویل د چارو د پرمختګ لپاره دوه اړخیزې همکارۍ ته اړتیا ده او په کار ده چې په دې برخه کې اړینه همغږي موجوده وي. د نوموړي په خبره افغانستان ته د بانکي سیستم له لارې د بشري او نورو مرستو راتګ د ټولو په ګټه دی هیله ده چې اړوند بنسټونه به هم په دې برخه کې له د افغانستان بانک سره همکاري وکړي.
باید وویل شي چې په دې غونډه کې له ماشومانو څخه د ساتنې ادارې مسئولینو په افغانستان کې د خپلو کړنو په اړه معلومات شریک کړل او په مالي او بانکي برخو کې یې د همکارۍ غوښتنه وکړه.
