د مالي ټيکاو د کمېټې پنځمه غونډه جوړه شوه
۱۴۰۰ کال د غبرګولي ۱۲ مه – د افغانستان بانک د سرپرست ښاغلي اجمل احمدي، د مالیې وزارت د سرپرست ښاغلي خالد پاینده او د دې کمېټې د نورو غړو په ګډون د مالي ټیکاوو د کمېټې پنځمه غونډه جوړه شوه.
د دې غونډې په پیل کې د افغانستان بانک سرپرست ښاغلي اجمل احمدي د کمېټې غړو ته د ښه راغلاست ویلو تر څنګ یادونه وکړه چې د مالي ټيکاو کمېټه غونډې د ولسمشرۍ ماڼۍ د ۳۴۰ ګڼې فرمان ۱۳۹۷/۰۹/۱۳ پر بنسټ جوړېږي چې د هېواد د مالي سکتور په اړه په کې بحث او خبرې کېږي.
ورپسې د افغانستان بانک د څارنې آمریت کارکوونکو د هېواد د مالي سکتور د فعالیتونو، آجراآتو او د مالي بنسټونو د فعلي وضعیت په اړه د آمارو او ارقامو په وړاندې کولو سره هر اړخیز راپور وړاندې کړ او یادونه یې وکړه چې که څه هم په نړۍ د کرونا وبا د خپرېدو له کبله د نړۍ ډېری هېوادونه په ځانګړې توګه کم پرمختللي هېوادونه متضرر شول، خو د افغانستان مالي سکتور په ښه حالت کې قرار لري او د غوره ټیکاو او پیاوړتیا په حال دی.
ورپسې له اجنډا سره سم د مالیې وزارت سرپرست ښاغلي خالد پاینده خبرې وکړې او زیاته یې کړه چې مالي ټیکاو د هېواد د مالي او بانکي نظام د پیاوړتیا لامل کېږي. نوموړي د سالم، پیاوړي او د باور وړ مالي نظام په برخه کې د مالي ټیکاو د کمېټې رول اغېزناک وباله.
په دې غونډه کې د مالي ټیکاو په برخه کې پر یو شمېر نړیوالو منل شویو متغیرونو او معیارونود بحث او د نظرونو له تبادلې وروسته پر یو شمېر مواردو هوکړه وشوه او قوانینو په رڼا کې د مالي او بانکي نظام پیاوړتیا لپاره اړینې پرېکړې تر سره شوې.
د یادونې وړ ده چې د غونډې په پای کې د دولتي کارکوونکو لپاره په مناسبه بیه د استوګنځایونو د جوړولو په موخه د سوداګریزو بانکونو له لوري د پورونو په برخه کې د آسانتیاوود رامنځته کولو درې اړخیز هوکړه لیک د افغانستان بانک، مالیې وزارت او د افغانستان د بانکونو ټولنې تر منځ لاسلیک شو.
بانکونه په بېلابېلو اقتصادي برخو کې د پورونو د ورکړې له لارې د ټولګټو پروژو په رامنځته کولو کې مهم رول لري.د افغانستان بانک هڅه کوي چې یاد سکتور د پورونو د ورکړې په برخه کې د آسانتیاوو د رامنځه کولو لپاره وهڅوي او له دې لارې د هېواد اقتصادي څرخ په حرکت را ولي چې په دې سره به ټولیزه پرمختګ ته لاره هواره شي.
