د پیسو نړیوال صندوق د یوې ارزونې په اوږدو کې د افغانستان له اقتصادي او مالي سمونونو هرکلی وکړ
۱۴۰۰ کال د وري ۲۶ مه – د پیسو نړیوال صندوق د یوې خبر پاڼې په خپرولو سره د افغانستان لپاره د کریډیټ د آسانتیاد غځونې د نوي پروګرام (ECF) د لومړنۍ دورې د ارزونې له بشپړېدو څخه خبر ورکړ او هغه یې بریالۍ وبلله.
تمه کېږي دا راپور د ارونې او منظورۍ په موخه د روان ۲۰۲۱ زیږدیز کال د جون په میاشت کې د نړیوال صندوق اجرائیوي بورد ته وړاندې شي چې په پایله کې به یې له افغانستان سره ۱۴۷ میلیون امریکايي ډالر مرسته وشي.
د پیسو د نړیوال صندوق د ارزونې ټیم له افغان چارواکو سره د افغانستان د اقتصاد د جوړښتیزه سمونونو د رامنځته کولو په تړاو د افغانستان د ژمنو په پلي کېدو بحث کړی او د کرونا وبا د خپرېدو له امله د قرنطین پر مهال د افغانستان له لوري د اقتصادي پروګرامونود محتاطانه اوغوره مدیریت او د مالي نظام د ټینګښت په برخه کې د افغانستان د کړنو ستاینه وکړله.
د افغانستان بانک سرپرست ښاغلي اجمل احمدي د مالي او اقتصادي سمونونو په برخو کې د پیسود نړیوال صندوق له بریالۍ ارزونې خوښي وښوده او ژمنه یې وکړه چې د لوی اقتصاد د ټیکاو، د مالي او بانکي سکتور په برخه کې د سمونونو، د اسعاري زېرمو د اغېزناکه مدیریت او زیاتوالي، له مالي جرمونو سره د مبارزې، پیسو وینځلو او ترهګرۍ د تمویل، له اداري فساد سره د مبارزې او د افغانستان د اقتصادي پرمختګ او کاري زمینو برابرولو په موخه د خصوصي سکتور د پیاوړتیا لپاره هلې ځلې کوي.
