په افغانستان کې د ملګرو ملتونو د پرمختیايي پروګرام له مشر ښاغلي عبدالله الدرداري سره غونډه
۱۴۴۳ شوال ۲۱ مه – په افغانستان کې د ملګرو ملتونو د پرمختیایي پروګرام له استازو سره غونډه جوړه شوه او د مالي او بانکي سکتور پر یو شمېر موضوعګانو پکې خبرې وشوې.
په یاده غونډه کې د افغانستان بانک ستر اقتصادي سلاکار ښاغلي لطف الحق نور پسرلي یادونه وکړه چې د افغانستان بانک ژمن دی چې له ټولو ادارو سره د قوانینو او مقرراتو په رڼا کې غوره مالي او بانکي اړیکې ولري.
باید وویل شي چې په دې غونډه کې د راتلونکو برنامو لپاره پر لا ډېرې همغږۍ ټینګار وشو او دواړو خواوو له یو بل سره د همکارۍ ژمنې وکړې.
د یادونې وړ ده چې په دې غونډه کې په افغانستان کې د ملګرو ملتونو د پرمختیايي پروګرام پر مشر ښاغلي عبدالله الدرداري سربېره له نوموړي سره مل پلاوي او د افغانستان بانک د بېلابېلو آمریتونو آمرینو او مرستیالانو ګډون کړی وو.
