د سوداګریزو بانکونو له استازو سره غونډه
۱۴۴۳ د شوال ۱۶ مه – د افغانستان بانک د لومړي مرستیال ښاغلي نور احمد آغا پر مشرۍ د افغانستان د بانکونو ټولنې او د سوداګریزو بانکونو له استازو سره غونډه جوړه شوه.
په دغه غونډه کې د بانکونو د امنیت ساتنې، خلکو ته پر وخت د غوره بانکي خدمتونو د وړاندې کولو، پیسو د لېږد را لېږد او د یو شمېر نورو بانکي موضوعګانو په اړه خبرې اترې وشوې او د نظرونو تبادله تر سره شوه.
په یاده غونډه کې د افغانستان بانک لومړي مرستیال ښاغلي نور احمد آغا یادونه وکړه چې د افغانستان بانک ژمن دی چې د سوداګریزو بانکونو لپاره اړینې آسانتیاوې رامنځته کړي، ترڅو یاد بانکونه له دې لارې د خلکو لپاره غوره خدمتونه وړاندې کړي.
ښاغلي نور احمدآغا زیاته کړه چې د چارو د لا همغږۍ او پرمختګ لپاره به د افغانستان بانک او سوداګریزو بانکونو دا ډول غونډې دوام ولري.
د افغانستان د بانکونو ټولنې او سوداګریزو بانکونو استازو هم له خپله اړخه د درنو هېوادوالو لپاره د غوره بانکي خدمتونو د وړاندې کولو ژمنه وکړه.
باید وویل شي چې په دې غونډه کې د افغانستان بانک دویم مرستیال ښاغلي عبدالقدیر احمد او د افغانستان بانک د بانکي چارو د څارنې لوی آمر ښاغلي عبدالرحمن قانت هم ګډون کړی وو.
