د افغانستان بانک د اداري غونډې جوړېدل
۱۴۴۵ جمادي الاول ۱۱ مه – د افغانستان بانک د دویم مرستیال ښاغلي حاجي ملا محمد آخوند په مشرۍ د افغانستان بانک اداري غونډه جوړه شوه.
په دغه غونډه کې د افغانستان بانک اړوندو آمریتونو پر وظیفوي صلاحیتونو، د آمریتونو ترمنځ په لا ډېرې همغږۍ، چارو په لا ښه والي، رامځته شویو پرمختګونو، کړنو او فعالیتونو بحث وشو.
په یاده غونډه کې د افغانستان بانک دویم مرستیال ښاغلي حاجي ملا محمد آخوند د دې غونډې په اوږدو کې د چارو په لا همغږۍ ټینګار وکړ او د افغانستان بانک له اړوندو آمرینو یې وغوښتل چې چارو ته د رسېدنې لپاره تر بل هر وخت ډېر پام وکړي، څو له دې لارې د درنو هېوادوالو لپاره د غوره خدمتونو د وړاندې کولو زمینه برابره شي.
په دې غونډه کې د افغانستان بانک د ریاست د دفتر لوی آمر ښاغلي صدیق الله خالد هم ګډون درلود او له ټولو آمرینو یې وغوښتل چې د ریاست الوزراء د عالي مقام د فرامینو، د افغانستان بانک د محترم عامل پلاوي د تصویبونو او نورو مسائلو په اړه پر وخت اجراآت تر سره کړي، نوموړي همدا راز زیاته کړه، چې ددې بانک اړوند ټولې شعبې او ادارې دې د ښې همغږۍ په درلودلو سره پر خپل وخت په پوره دقت او با مسؤلیته توګه خپل کارونه ترسره کړي او د مراجعینو کارونه د له خنډ او ځنډ پرته تر سره کړي.
باید وویل شي چې په دې غونډه کې ګډونوالو د خپلو آمریتونو اړوند ستونزې او وړاندیزونه د افغانستان بانک له دویم مرستیال سره شریک کړل، یو شمېر ستونزو ته حل لارې وړاندې شوې د نورو ستونزو او وړاندیزونو د حل په موخه لازمې سپارښتنې وشوې.
