د افغانستان بانک د روڼتیا او د حساب ورکونې اصل ته ژمن دی
کابل، ۱۳۹۹ د سلواغې ۷ ـ ملت ته د دولت د حساب ورکونې د پروګرام په لړ کې نن د افغانستان بانک مسؤولینو د ۱۳۹۹ مالي کال په اوږدو کې د دې بانک د کړنو او لاسته راوړنو راپور د حکومت د رسنیو په مرکز کې له ډله ایزو رسنیو او د هغوي له لارې له خلکو سره شریک کړ.
د دې کنفرانس په پیل کې د بانکونو د څارنې لوی آمر ښاغلي نثار احمد یوسفزي د بیو د ټیکاو چې د افغانستان بانک لومړنی موخه جوړوي، د مالي نظام د ټینګښت او همدا ډول مالي او بانکي خدمتونو ته د خلکو د لاسرسي د اسانتیا په موخه د اداینې د سیستمو د عصري کولو په برخو کې د افغانستان بانک د موخو، دندو او پروګرامونو په تړاو یادونه وکړه او له رسنیو سره یې هر اړخیزه معلومات شریک کړل.
ورپسې د بازار عملیاتو لوی آمر ښاغلي نجیب الله اثیر د اسعاري زېرمو، د افغانۍ د مبادلې نرخ او د لیلام د پروسې په اړه د خپلو خبرو په ترڅ کې وویل چې په تیر کال کې زمونږه اسعاري زېرمو وده درلوده او اوس مهال د افغانستان ناخالصه زېرمې ۹.۵ میلیارده امریکايي دالرو ته رسیږي چې د تیر کال په پرتله د پام وړ زیاتوالی ښکاره کوي.
د دې کنفرانس په بله برخه کې د افغانستان بانک د اداینو لوی آمر ښاغلي میر عزیز بره کي د دې بانک د اداینیزو کړنو په اړه د خبرو په ترڅ کې وویل چې د افغانستان بانک توانیدلی دی چې د ۱۳۹۹ مالي کال په اوږدو کې د هېواد د بانکونو ترمنځ د اداینې د سیستمونو د نښلولو پروسه په بریالیتوب سره ترسره کړي.
ښاغلي بره کي زیاته کړه چې اوس مهال د مالیې وزارت خزاین، عواید او ګمرکونه د افغانستان بانک له عصري اداینیزو سیستمونو سره نښلول شوي او خلک کولای شي د دې سیستم په کارولو سره خپلې ټولې اداینیزې معاملې په خپل وخت سره ترسره کړي.
د افغانستان بانک د اداینو لوی آمر د پیسو د چاپ او د زړو پیسو د راټولولو او د له منځه وړلو په تړاو هم خبرې وکړې او زیاته یې کړه چې د افغانستان بانک هر کال په اوسط ډول ۳.۸ میلیارده افغانۍ زاړه بانکنوټونه راټولوي او د پیسو له ګردښت څخه یې وباسي. ښاغلي بره کي زیاته کړه چې د افغانستان بانک د مالي کال په اوږدو کې دوړو انواعیو (۱۰ – ۲۰ – ۵۰ او ۱۰۰ ) افغانیو د ۳۸۰ میلیونه قطعوبانکنوټونو د چاپ تړون لاسلیک کړه او په دې وروسیتو کې یې یو اندازه پیسې ترلاسه کړی چې تمه کیږي بازار ته عرضه او په دې برخه کې د خلکو ستونزې حل کړي.
د یادونې وړ ده چې د دې کنفرانس په اوږدو کې د رسنیو د مسوولینو پوښتنو ته چې په دې پروګرام کې یې ګډون درلوده، ځوابونه وړاندې شول.
